म. टा. प्रतिनिधी, औरंगाबाद
राज्य कर्करोग संस्थेमध्ये मागच्या वर्ष-दीड वर्षापासून धूळखात पडलेल्या 'भाभा ट्रॉन' मशीनच्या ट्रायल संपल्या असून, हे उपकरण एकदाचे दैनंदिन रुग्णसेवेत दाखल झाले आहे. याच मशीनवर दररोज सुमारे ४० रुग्णांवर किरणोपचार केले जात आहेत आणि त्यामुळेच किरणोपचारांची प्रतीक्षादेखील चक्क आठवड्यावर आली आहे. पुढच्या टप्प्यात आणखी एक लिनॅक मशीन उपलब्ध झाल्यानंतर प्रतीक्षा यादी शब्दशः शून्यावर येईल, अशी अपेक्षा आहे.
स्टेट कॅन्सर इन्स्टिट्यूट अर्थात राज्य कर्करोग संस्थेचा दर्जा मिळालेल्या शहरातील शासकीय विभागीय कर्करुग्णालयाला अडीच-तीन वर्षांपूर्वी टाटा मेमोरियल हॉस्पिटलने आपले उपकेंद्र म्हणून जाहीर केले. त्याचाच भाग म्हणून टाटा मेमोरियल हॉस्पिटलच्या वतीने कर्करुग्णालयाला किरणोपचारांसाठी तब्बल तीन कोटींचे भाभा ट्रॉन हे खास भारतीय बनावटीचे उपकरण देणगी म्हणून देण्यात आले. मात्र, भाभा ट्रॉनसाठी लागणारे बंकर तयार करण्याचे काम रखडल्याने तसेच 'अॅटोमिक एनर्जी रेग्युलेटरी बोर्ड'ने (एईआरबी) त्रुटी काढल्यामुळे हे महागडे उपकरण तब्बल वर्ष ते दीड वर्ष रुग्णालयात धूळखात पडून होते. 'एईआरबी'ने काढलेल्या त्रुटींची पूर्तता केल्यानंतर एकदाची परवानगी मिळाली आणि त्यानंतर ट्रायल्स पूर्ण होऊन अलीकडेच हे उपकरण दैनंदिन रुग्णसेवेत दाखल झाले आहे. या उपकरणाच्या सहाय्याने दररोज ४० कर्करुग्णांना किरणोपचार दिले जात असून, पूर्वीच्या लिनॅक उपकरणावर १०० पेक्षा जास्त रुग्णांवर किरणोपचार केले जात आहेत. दोन्ही उपकरणांमुळे रुग्णांची प्रतीक्षा यादी झपाट्याने घटली असून, सद्यस्थितीत केवळ आठवड्याचे वेटिंग असल्याचे रुग्णालयाच्या वतीने सांगण्यात आले. 'भाभा ट्रॉन'च्या त्रुटींची पूर्तता करताना तीन ते चार नवीन किरणोपचार तंत्रज्ञ उपलब्ध झाल्यानेही कर्करुग्णालयामध्ये सकाळी साडेनऊ ते सायंकाळी साडेसहा-सातपर्यंत किरणोपचार होत आहेत आणि म्हणूनही वेटिंग कमी होणे शक्य झाले आहे. हेच वेटिंग पूर्वी काही महिन्यांवर गेले होते.
५० कोटींची उपकरणे लवकरच
शासकीय कर्करुग्णालयाला राज्य कर्करोग संस्थेचा दर्जा मिळाला असल्याने रुग्णालयाला केंद्र सरकारच्या वतीने तब्बल ४० ते ५० कोटींची उपकरणे मिळणार आहेत. यातून किरणोपचारांचे आणखी एक स्वतंत्र युनिट उभे राहणार आहे. यामध्ये किरणोपचारांसाठी २५ कोटी रुपयांच्या लिनॅक उपकरणासह ब्रेकेथेरपी, सिटी सिम्युलेटर आदी उपकरणे उपलब्ध होणार आहेत. तसेच सिटी स्कॅन, एमआरआय, डिजिटल मॅमोग्राफी, डिजिटल एक्स-रे आदी अतिशय महत्वाच्या उपकरणांचाही यामध्ये समावेश असेल. कर्करुग्णालयामध्ये किरणोपचारांचे आणखी एक स्वतंत्र युनिट उभे राहणार असल्यामुळे कर्करुग्णांच्या तपासण्यांसाठी तसेच उपचारांसाठी वेटिंग जवळजवळ शून्यावर येईल, अशी सुचिन्हे आहेत.
'भाभा ट्रॉन'मुळे वेटिंग अगदी आठवड्यावर वेटिंग आले आहे आणि दुसऱ्या टप्प्यातील उपकरणे प्राप्त झाल्यानंतर हेच वेटिंग शून्यावर येईल. ही दुसऱ्या टप्प्यातील उपकरणे वर्षअखेरपर्यंत उपलब्ध होतील, अशी अपेक्षा आहे.
- डॉ. अरविंद गायकवाड, विशेष कार्य अधिकारी, शासकीय कर्करुग्णालय