तमाम कष्टकऱ्यांचे जगणे असह्य करणारा वॉर्ड म्हणजे हमालवाडा, असे वर्णन केले तर वावगे ठरू नये, अशा भयंकर स्थितीमध्ये वॉर्डातील गोरगरीब जनता दशकापासून किंवा त्याहीआधीपासून आयुष्य कंठीत आहे. पालिकेच्या नाकर्तेपणामुळेच चक्क ड्रेनेजचे पाणी शेकडो कष्टकऱ्यांच्या वाट्याला आलेले असतानाच अस्वच्छतेचे साम्राज्य काय असते, याचा 'उत्तम' नमुना या वॉर्डात पाहायला मिळतो. रस्त्यांची दुर्दशाही हाडे खिळखिळी करणारी आहे. त्यामुळे हा वॉर्ड एकविसाव्या शतकातील आहे का, असाही प्रश्न उपस्थित झाल्याशिवाय राहात नाही.
हा वॉर्ड हमालवाड्याच्या नावाने असला तरी वॉर्डात सिल्कमिल कॉलनी, धनगरवाडा, शहाशोक्तमियाँ दर्गा, पोलिस कॉलनी, सफा मशीद परिसराचाही समावेश होतो. मात्र सर्वांत वाईट स्थिती आहे ती हमालवाड्याची. मागच्या दोन दशकांपासून कोणत्याच ठोस सुधारणा झाल्या नसल्याचे रहिवाशांचे म्हणणे आहे. त्यातही गत दशकात सगळ्याच समस्यांनी गंभीर स्वरुप धारण केले आहे. जवळजवळ सात गल्ल्या असलेल्या हमालवाड्यात एखाद-दुसरी गल्लीवगळता सगळ्याच रहिवाशांना ड्रेनेजमिश्रीत पाण्याचा पालिकेच्या नळातून पुरवठा होतो, ही सगळ्यात मोठी गंभीर समस्या रहिवाशांना अनेक महिन्यांपासून भेडसावत आहे. कितीतरी वेळ नळाला काळे-घाण-दुर्गंधीयुक्त पाणी येते आणि शेवटच्या काही मिनिटांमध्ये काहीअंशी कमी घाण पाणी येते. त्यावरच गुजराण करण्याची वेळ रहिवाशांवर आली आहे. काही ठिकाणी तर पाणीच येत नाही, अशीही तक्रार आहे. मुळात अरुंद असलेल्या गल्ल्यांमध्ये रस्ता नावाचा प्रकारच अस्तित्वात नाही. चक्क चालतानाही कसरत करावी लागते, तिथे दुचाकी चालवताना काय अवस्था होत असेल याची कल्पना करता येऊ शकते. अरुंद रस्त्यांमुळे घंटागाडीचाही विषय आपोआप संपला आहे; किंबहुना ते यंत्रणेला एक 'उत्तम' निमित्त मिळाले आहे. अस्वच्छतेनेही टोकाची परिसीमा गाठली आहे. बहुतांश नाल्या-गटारी तुंबलेल्या किंवा वाहत्या असल्या तरी साफसफाई होत नसल्याचे एकाच कटाक्षात लक्षात आल्याशिवाय राहात नाही. सार्वजनिक शौच्चालयाची अवस्थाही अत्यंत वाईट असल्याचे रहिवाशांचे म्हणणे आहे. अशा परिस्थितीत शेकडो लहान मुले-वृद्ध कसे राहात असावेत, असे अनेक प्रश्न अस्वस्थ करायला लावणारे आहेत. हमालवाड्यात आजारी पडणाऱ्यांची संख्याही जास्त असल्याचे नागरिक म्हणतात. याचा अर्थ इतर भागांत खूप चांगल्या सुविधा आहेत, असेही नाही. मुख्य रस्त्यांसह अनेक अंतर्गत रस्त्यांची अवस्था बिकट झाली आहे.
\Bवॉर्डातील प्रमुख समस्या
\B- बहुतांश हमालवाड्यात घाण-दुर्गंधीयुक्त पाण्याचा पुरवठा
- हमालवाड्यातील रस्त्यांची स्थितीदेखील अत्यंत वाईट
- ना स्वच्छता ना सुविधा ना व्यवस्था अशी एकंदरीत स्थिती
- एक कोटीची कामे मंजूर, पण कामे झाली नसल्याचा दावा
- इतरही भागातील रस्त्यांची दुरवस्था, स्वच्छता नावालाच
\Bपाच वर्षात झालेली कामे
\B- सिल्कमिल कॉलनीत रस्ते व इतर काही कामे झाली
- पालिकेची नवीन शाळा झाली सुरू, ६०० मुलांची सोय
- शाळेत मुलांसाठी वैशिष्ट्यपूर्ण प्रयोगशाळेची सुविधा
- बिस्मिल्ला मशिदीलगत डीपी रोडला मिळाली मंजुरी
- वॉर्डात काही ठिकाणी झाली रस्ते, ड्रेनेजलाईनची कामे
\Bनगरसेवक काय म्हणतात?
\Bहमालवाड्यातील रस्ते, ड्रेनेजलाईन व इतर कामांसाठी तब्बल एक कोटींचे बजेट मंजूर आहे, टेंडरही निघाले आहे. याच हमालवाड्यामध्ये ग्रंथालयाचे कामही मंजूर आहे; परंतु कंत्राटदाराकडून कामे केली जात नाहीत, हा माझा दोष नाही. माझ्याच पुढाकारातून वॉर्डात महापालिकेची शाळा सुरू झाली आहे. सिल्कमिल कॉलनीतील ७५ टक्के कामे पूर्ण झाली आहेत व उर्वरित २५ टक्के मंजूर आहेत, पण कंत्राटदाराने केलेली नाहीत. डीपी रोडचे कामही मंजूर झालेले आहे.
\Bमुल्ला सलीमा बेगम खाजोद्दीन\B, नगरसेवक
\Bपाण्यात आळ्या, तरी यंत्रणेचे दुर्लक्ष
\Bहमालवाड्यामध्ये सुमारे ५० वर्षांपूर्वी केलेल्या पाईपलाईन तसेच ड्रेनेजलाईन अजूनही बदललेल्या नाहीत आणि त्यामुळेच सगळेच प्रश्न उपस्थित होत आहेत, असाही या रहिवाशांचा आरोप आहे. धक्कादायक म्हणजे नळातून आळ्या असणारे पाणी येते तरी पालिका प्रशासनाकडून सातत्याने दुर्लक्ष केले जाते, याविषयी रहिवाशांमध्ये मोठा रोष दिसून येत आहे. एकीकडे कमालीच्या अस्वच्छतेसह दुषित पाण्यामुळे रोगराई व आजारपण वाढत असताना, दुसरीकडे वॉर्डातील आरोग्य केंद्र बंद पडले आहे. त्यामुळे आमच्यासारख्या गोरगरीबांनी जावे कुठे, असा सवालही नागरिकांमधून उपस्थित केला जातो आहे.
आम्ही गोरगरीब असल्यामुळे आम्हाला घाण पाण्याची शिक्षा दिली जाते का? का आम्ही माणसे नाहीत? आमची मुले सतत आजारी पडतात, पण त्याचे पालिकेला काहीही सोयरसुतक नाही.
\Bमीना रगडे\B, नागरिक
आम्हाला मागच्या २० वर्षांपासून कोणत्याच ठोस नागरी सोयी-सुविधा मिळालेल्या नाहीत. नगरसेविका किंवा पालिकेचे अधिकारी तर ढुंकूनही पाहायला तयार नाही. निदान आम्ही कसे जगतो, हे तरी त्यांनी पाहावे.
\Bचंपाबाई वाहूळ\B, नागरिक
\Bमागील निवडणूक
\Bमुल्ला सलीमा बेगम खाजोद्दीन: प्राप्त मते: २४७२
मोहम्मद शबाना बेगम खिजर हयात: प्राप्त मते: १०४९
\Bमतदारसंख्या
\Bएकूण मतदार: सुमारे १६,०००
गेल्या निवडणुकीतील मतदान : ५३०९