​ ‘नामका’तून सोडणार पाणी

वैजापूरः वैजापूर व गंगापूर तालुक्यांसाठी नांदुर मधमेश्वर जलदगती कालव्यातून गुरुवारी पाणी सोडण्यात येणार आहे. हे आवर्तन २१ दिवस सुरु राहणार असल्याची माहिती पाटबंधारे विभागाने दिली आहे.

रब्बी हंगामासाठी वैजापूर व गंगापूर या दोन तालुक्यांतील सहा हजार हेक्टर क्षेत्राला या आवर्तनातून सिंचनाचा लाभ होणार आहे. रब्बी हंगामासाठी जलदगती कालव्यातून पाणी सोडण्याचा निर्णय कालवा सल्लागार समितीच्या बैठकित झाला होता. त्यानुसार गुरुवारी सकाळी कालव्यातून पाणी सोडण्याची कार्यवाही करण्यात येईल, अशी माहिती कालवा विभागाचे उपकार्यकारी अधिकारी ए. व्ही. उदावंत यांनी दिली. सकाळी सहाशे क्युसेक या विसर्गाने कालव्यातून पाणी सोडण्यात येईल. हे पाणी शनिवारी सकाळी वैजापूर तालुक्याच्या हद्दीत दाखल होण्याची शक्यता आहे. पायथा ते माथा नियमानुसार आदी गंगापूर तालुक्याला कालव्याचे पाणी सोडण्यात येणार असून त्यानंतर वैजापूर व कोपरगावला पाणी देण्यात येणार आहे.