म. टा. प्रतिनिधी, औरंगाबाद
व्यवसायासाठी माहेरहून पैसे आण म्हणत विवाहितेला शिविगाळ, माराहण करून घराबाहेर हाकलून जिवे मारण्याची धमकी दिल्याच्या प्रकरणात संशयित आरोपी पती सय्यद रहीम सय्यद नवाब याची एक वर्षाच्या चांगल्या वर्तणुकीच्या हमीवर व १५ हजारांच्या वैयक्तिक बंधपत्रावर अटी व शर्तींसह मुक्तता करण्याचे आदेश प्रथम वर्ग न्यायदंडाधिकारी एच. एस. पुराडउपाध्ये यांनी दिले.
या प्रकरणी विवाहिता शिरीन सय्यद रहीम हिने फिर्याद दिली होती. पीडितेचे लग्न ११ ऑगस्ट २०१४ रोजी झाले होते. लग्नानंतर दोन महिने चांगले वागवल्यानंतर पतीसह सासरच्यांनी कपड्याच्या व्यवसायासाठी माहेरहून २० हजार रुपये आण, असा तगादा लावला होता. विवाहितेने हे माहेरी सांगितल्यानंतर आरोपींना २० हजार रुपये दिले. मात्र आणखी ५० हजार रुपयांची मागणी केली. त्याला विवाहितेने नकार दिला. त्यामुळे संशयित आरोपींनी तिचा छळ सुरू केला. २२ सप्टेंबर २०१५ रोजी दुपारी चार वाजता घरगुती कारणावरून विवाहितेला तिच्या सासुने शिविगाळ व मारहाण केली, तर पती सय्यद रहीम सय्यद नवाब (वय २६, रा. मुजीब कॉलनी) याने 'तू माहेरहून व्यवसायासाठी पैसे का आणत नाही' असे म्हणत चामडी पट्ट्याने मारहाण केली व घरातून हाकलून लावले. तसेच जिवे मारण्याची धमकीही दिली. प्रकरणात विवाहितेच्या तक्रारीवरून जिन्सी पोलिस ठाण्यात गुन्हा दाखल करण्यात आला होता.
\Bसात हजार रुपये भरपाई
\Bखटल्यावेळी, सहाय्यक सरकारी वकील अशोक सोनवणे यांनी पाच साक्षीदारांचे जबाब नोंदविले. दोन्ही बाजुंच्या युक्तिवादानंतर व साक्ष-पुराव्यांवरून न्यायालयाने आरोपी सय्यद रहीम याला दोषी धरून भारतीय दंड संहितेच्या कलम ३२३ अन्वये एक वर्षाच्या चांगल्या वर्तवणुकीच्या हमीवर व १५ हजारांच्या वैयक्तिक बंधपत्रावर अटी व शर्तींसह सोडण्याचे आदेश दिले. तसेच दंडाच्या रक्कमेपैकी सात हजार रुपये नुकसान भरपाई म्हणून पीडितेस देण्याचे आदेशही न्यायालयाने दिले.