तुम्ही आधी रसद द्या! मनसेकडून 'धन की बात'; नांदगावकरांची महायुतीकडे महत्त्वाची मागणी

छत्रपती संभाजीनगर: महाराष्ट्र नवनिर्माण सेनेचे अध्यक्ष राज ठाकरेंनी गुढीपाडव्याच्या सभेत महायुतीला बिनशर्त पाठिंबा जाहीर केला. पंतप्रधान नरेंद्र मोदींसाठी बिनशर्त पाठिंबा देत असल्याची घोषणा त्यांनी केली. मनसेचे कार्यकर्ते तन आणि मनानं तुमचे काम करतील. तुम्ही केवळ रसद पुरवा, अशी साद मनसेचे नेते बाळा नांदगावकर यांनी महायुतीला घातली आहे.

संभाजीनगरातील आयएमए हॉलमध्ये मनसे पदाधिकाऱ्यांचा मेळावा झाला. यावेळी व्यासपीठावर जिल्ह्याचे पालकमंत्री संदिपान भुमरे, आमदार प्रदीप जैस्वाल, संजय शिरसाट, मनसेचे संपर्क नेते दिलीप धोत्रे, जिल्ह्याध्यक्ष सुमीत खांबेकर उपस्थित होते. निवडणुकीत पक्षाच्या पदाधिकाऱ्यांना मानसन्मान मिळावा. पक्षप्रमुखांचे छायाचित्र प्रचार रॅलीत असावं, अशी अपेक्षा नांदगावकरांनी व्यक्त केली.
भुजबळांनी दावा सोडला अन् पेच सुटला नव्हे वाढला; नाशकात महातिढा, 'ती' भीती खरी ठरणार?
मनसे १८ वर्षांपासून सत्तेत नाही. पक्षाचे कार्यकर्ते तन आणि मनानं तुमचं काम करतील. तुम्ही त्यांना धन द्या. रसद पुरवा, अशी मागणी नांदगावकरांनी मेळाव्याला उपस्थित असलेल्या महायुतीच्या नेत्यांकडे केली. त्यावर मनसे पदाधिकाऱ्यांची काळजी घेण्याची आणि त्यांना मानसन्मान देण्याची ग्वाही मंत्री संदिपान भुमरेंनी दिली.

मनसेला हव्या होत्या चार जागा
मनसेनं महायुतीकडे चार जागांची मागणी केली होती. नंतर आम्ही तीन जागांवर आलो. परंतु ते एकच जागा देण्यास तयार झाले. याशिवाय कमळ चिन्हावर निवडणूक लढा, असा आग्रह धरण्यात आला. ही मागणी राज ठाकरेंनी स्पष्टपणे फेटाळली आणि बिनशर्त पाठिंबा जाहीर केला, असं नांदगावकरांनी सांगितलं.