म. टा. प्रतिनिधी, औरंगाबाद
ट्रेकिंगसाठी जाणाऱ्या महिलेला स्टिलच्या रॉडने जबर मारहाण करून मोबाइल व पर्स हिसकावण्याचा प्रयत्न केल्याच्या प्रकरणात महावीर पंडित फड (वय २९, रा. गुरुदक्षिणा अपार्टमेंट, सिडको महानगर, एमआयडीसी वाळूज), आकाश संतोष सरोदे (वय २१, रा. जयभवानीनगर) व अक्षय राजकुमार कांगडा (वय २५, रा. विश्रांतीनगर, गारखेडा) यांना गुरुवारपर्यंत (२९ ऑगस्ट) पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. एस. वाडकर यांनी बुधवारी दिले.
या प्रकरणी मनीषा सुनील पाटील (वय ५०, रा. जयभवानीनगर, गारखेडा) यांनी फिर्यादी दिली होती. त्या ११ ऑगस्ट रोजी पहाटे साडेपाचला त्या ट्रेकिंगला जाण्यासाठी घरातून निघाल्या होत्या. काही अंतर पार केल्यानंतर दोन व्यक्ती त्यांच्या मागे धावत आल्या. त्यांनी फिर्यादीकडील पर्स व मोबाइल हिसकाविण्याचा प्रयत्न केला, पाटील यांनी प्रतिकार करत तिथून पळण्याचा प्रयत्न केला. मात्र आरोपींनी त्यांना रॉडने मारहाण केली. आरडा-ओरड ऐकून रस्त्यापलीकडे उभे असलेले काही लोक येत असल्याचे पाहून आरोपींनी धूम ठोकली. या प्रकरणात पुंडलिकनगर पोलिस ठाण्यात गुन्हा दाखल होऊन आरोपी आकाश संतोष सरोदे व अजय राजकुमार कांगडा याला अटक करण्यात आली. चौकशीदरम्यान त्यांनी गुन्हा केल्याची कबुली दिली. तसेच फड नावाच्या व्यक्तीने मोबाइल चोरण्यास सांगितले होते. त्यामुळे आम्ही फिर्यादीचा मोबाईल चोरण्याचा प्रयत्न केल्याचे सांगितले. त्यानंतर आरोपी महावीर पंडित फड याला अटक करण्यात आली.
\Bमोबाइल चोरीचा तपास बाकी
\Bप्रकरणात तिघा आरोपींना बुधवारी न्यायालयात हजर करण्यात आले असता, आरोपींना फिर्यादीचा मोबाइल कशासाठी चोरी करायचा होता, आरोपींचे आणखी कोणी साथीदार आहेत का आदी बाबींचा तपास करावयाचा असल्याने आरोपींना पोलिस कोठडी देण्याची विनंती सहाय्यक सरकारी वकील सय्यद शेहनाझ यांनी न्यायालयात केली. ही विनंती मान्य करून न्यायालयाने आरोपींना गुरुवारपर्यंत पोलिस कोठडी सुनावली.