मुलीचा ताबा घेण्यासाठी विवाहितेला पेटवले!

औरंगाबादः मुलीचा ताबा देण्याची मागणी करत विवाहितेला पेटवून दिल्याचा प्रकार सिडको एन सात भागात रविवारी रात्री घडला. याप्रकरणी पती व दिराविरुद्ध खुनाचा प्रयत्न केल्याप्रकरणी सिडको पोलिस ठाण्यात गुन्हा दाखल करण्यात आला आहे.

सिडको परिसरात एक पंचवीस वर्षाची म‌हिला मुलीसोबत राहते. रविवारी रात्री अकरा वाजता तिचा पती अमोल देविदास सुरडकर व विजय देविदास सुरडकर (दोघे रा. कुंभारी, ता. भोकरदन, जि. जालना) तिच्या घरी आले. या दोघांनी तिला मुलगी आमची आहे, ती आम्हाला ‌दे, आम्ही तिला अनाथ आश्रमात टाकतो, असे म्हणत वाद घालून शिवीगाळ करत मारहाण केली. तसेच तिचा दिर विजयने तिला खाली पाडून मारहाण करत अंगावर रॉकेल टाकून पेटवून देत ठार मारण्याचा प्रयत्न केला. याप्रकरणी महिलेने दिलेल्या तक्रारीवरून सोमवारी दोन्ही आरोपींविरुद्ध सिडको पोलिस ठाण्यात खुनाचा प्रयत्न केल्याप्रकरणी गुन्हा दाखल करण्यात आला आहे.