म. टा. प्रतिनिधी, औरंगाबाद
'तुम्हीच लावा तुमच्या मालमत्तांना कर,' अशी योजना महापालिकेने सुरू केली आहे. या योजनेचे अर्ज येत्या दोन दिवसात वितरित केले जाणार आहेत. या योजनेच्या माध्यमातून १५ दिवसांत ५० हजार मालमत्तांचे स्वयं मुल्यांकन (सेल्फ असेसमेंट) करण्याचे उद्दिष्ट ठेवण्यात आले आहे, अशी माहिती पालिकेचे करमुल्य निर्धारक व संकलक करणकुमार चव्हाण यांनी दिली.
चव्हाण म्हणाले की, मार्च अखेरपर्यंत महापालिका हद्दीतील शंभर टक्के मालमत्तांना कर आकारणी झाली पाहिजे या दृष्टीने आयुक्त आस्तिककुमार पाण्डेय यांच्या नेतृत्वाखाली काम सुरू आहे. आतापर्यंत सुमारे दोन लाख मालमत्तांचे सर्वेक्षण झाले आहे. आणखीन किमान ५० हजार निवासी मालमत्तांचे सर्वेक्षण करायचे आहे. सर्वेक्षण करणारे कर्मचारीच कर आकारणी व कर वसुली करतात, त्यामुळे सर्वेक्षण करून कर आकारणीच्या कामाला मर्यादा येत आहेत. हे लक्षात घेवून आयुक्तांनी स्वयं मुल्यांकन योजना आणली आहे. यासाठी मालमत्ताधारकांना विशिष्ट अर्ज दिला जाणार आहे. त्यावर मालमत्ताधारकाने आपल्या मालमत्तेचा तपशील, मोजमाप लिहायचे आहे. त्याने लिहिलेला तपशील ग्राह्य धरून कर आकारणी केली जाणार आहे.
\B५० हजार अर्ज \B
स्वयं मुल्यांकन योजनेसाठी ५० हजार अर्ज छापून घेतले आहेत. हे अर्ज प्रत्येक वॉर्ड कार्यालयात पोचवले जातील. वॉर्ड कार्यालयामार्फत ते मालमत्ताधाराकांना अर्ज दिले जातील. अर्ज मिळाल्यावर तो दोन किंवा तीन दिवसांत भरून वॉर्ड कार्यालयात सादर करायचा आहे. स्वयं मुल्यांकन योजनेचा नागरिकांनी लाभ घ्यावा, असे आवाहन चव्हाण यांनी केले आहे.