पुन्हा व्हिडिओ टाकला तर चेहरा खराब करू; इंस्टाग्रामवर Reels टाकणाऱ्या तरुणाला मारहाण

औरंगाबाद : सध्या सोशल मीडियाने सर्वांनाच भुरळ घातली आहे. त्यात राजकीय नेत्यामध्ये सोशल वॉर ही नेहमीच पाहायला मिळतं. अशात सध्याच्या तरुणाईमधे रिल्सची प्रचंड क्रेझ आहे. याच रिल्स बनविण्यामुळे एका तरुणाला तीन तरुणांनी बेदम मारहाण करून चेहरा खराब करण्याची धमकी दिल्याचा प्रकार औरंगाबदेत घडला आहे.

यामुळे मनोरंजनाचं साधन असलेल्या रिल्स देखील आता तरुणाईमध्ये भांडणाचं कारण बनत असल्याचं दिसून येत आहे. ऋतिक पार्शवनाथ महिंद्रकर (रा. हर्सूल, औरंगाबाद) असं मारहाण झालेल्या तरुणाचं नाव आहे. तर आकाश घुनावत (रा.मयूर पार्क), ऋतिक व विपुल ( दोन्ही रा. म्हाडा कॉलोनी, औरंगाबाद) अशी मारहाण करणाऱ्या आरोपींची नावे आहेत.

४ ठिकाणी बॉम्ब ठेवलेत ५ कोटी दे नाहीतर...; ललित हॉटेल धमकी प्रकरणी पोलिसांची मोठी कारवाई
ऋतिकला इन्स्टाग्राम या सोशल मीडियावर विविध रिल्स बनवण्याचा छंद आहे. तो रोज नवनवीन ठिकाणी जाऊन रिल्स बनवायचा आणि त्या इन्स्टाग्रामवर टाकायचा. त्याच्या रिल्समुळे तो सोशल मीडियावर चंगलाच प्रसिद्ध व्हायला लागला होता. मात्र, त्याची प्रसिद्धी ही आरोपी तरुणांना खूपत होती. त्यामुळे तिन्ही तरुणांनी ऋतिकला गाठत बेदम मारहाण केली.

यानंतर जास्त रिल्स व्हिडिओ इन्स्टाग्रामवर टाकल्यास तुझा चेहरा खराब करून टाकेल अशी धमकी दिली. या प्रकरणी हर्सूल पोलीस ठाण्यात तिन्ही तरुणाविरोधात गुन्हा दाखल करण्यात आला आहे. तर पोलीस प्रकरणाचा तपास करत असल्याची माहिती आहे.