बीडच्या अंबाजोगाईतील जवान सूर्यकांत तेलंगे शहीद, पठाणकोटमध्ये मोठी घटना

अंबाजोगाई, बीड : अंबाजोगाई येथील स्वाराती रुग्णालयातील अधिपरिचारिका मनीषा तेलंगे यांचे पती तथा सैन्यदलातील जवान सूर्यकांत शेषराव तेलंगे (वय ३५) हे शहीद झाले. पठाणकोट जिल्ह्यातील मिरथल छावणीत ते तैनात होते. मिरथल छावणी परिसरात सहकारी जवानाने सोमवारी आपल्या रायफलने केलेल्या गोळीबारात तेलंगे शहीद झाले, अशी प्राथमिक माहिती मिळाली आहे. गोळीबार करणारा जवान फरार झाल्याची माहिती आहे.

मिरथल छावणी गोळीबारात अन्य एक जवान देखील शहीद झाला असल्याची माहिती आहे. या घटनेमागचे कारण अद्याप स्पष्ट झालेले नाही. मुळचे शिरूर अनंतपाळ तालुका (जि.लातूर) थेरगावचे रहिवासी असलेले सुर्यकांत तेलंगे हे पत्नीच्या नोकरीच्या निमित्ताने मागील आठ वर्षांपासून अंबाजोगाईत वास्तव्यास होते. त्यांच्या पार्थिवावर त्यांच्या मुळगावी थेरगाव (नळेगाव ) जि. लातूर येथे अत्यंसंस्कार होणार आहेत, अशी प्राथमिक माहिती सूत्रांनी दिली आहे.

शिरूर आनंतपाळ तालुक्यातील थेरला नळेगाव जिल्हा लातूर येथील जवान सूर्यकांत हे पठाणकोट जिल्ह्यातील मिरथल छावणी परिसरात कार्यरत होते. सोमवारी झालेल्या गोळीबारात सूर्यकांत तेलंगे हे शहीद झाले. त्यांचे पार्थिव शरीर हे त्यांच्या गावी आणण्यात येणार असल्याची माहिती आहे. सूर्यकांत तेलंगे यांच्या निधनाचे वृत्त गावकऱ्यांना कळल्यानंतर व्यवहार बंद ठेवून सूर्यकांत तेलंगे यांना आदरांजली वाहिली आहे.

बीडमध्ये तुफान पाऊस; अनेक गावांचा संपर्क तुटला, नागरिकांचे प्रचंड हाल

सूर्यकांत यांचे दहावीपर्यंतचे शिक्षण हे गावातच झाले आहे. तर बारावीचे शिक्षण रापका एथील लोकजागृती विद्यालयात झाले होते. सूर्यकांत यांचे वडील हे दुसऱ्यांकडे सालगडी म्हणून काम करतात. तर आई रोजंदारीने कामावर जाते. अत्यंत हलाखीच्या परिस्थितीतून स्वतःला त्यांनी सैन्यदलात झोकून दिले. सूर्यकांत यांनी कै. रवींद्र करिअर अकॅडमी पोलादपूर महाड येथे भरतीपूर्व शिक्षण घेतले होते. रायगड येथे २००७ मध्ये ते सैन्यदलात दाखल झाले त्यानंतर २०१४ मध्ये सूर्यकांत यांचा विवाह झाला. पत्नी, दोन मुले, आई-वडील आणि भाऊ असा मोठा परिवार त्यांच्या पश्चात आहे. मात्र निधनाच्या घटनेने संपूर्ण गावात शोककळा पसरली आहे. त्यांचं पार्थिव मंगळवारी त्यांच्या मूळ गावी आणण्यात येणार असल्याची माहिती आहे.

पहिल्याच पावसात बीडमध्ये पाणीच पाणी, होडीसाठी कर्ज देण्यास आंदोलन