बीडमध्ये बँक अधिकाऱ्याच्या घरावर दरोडा

मटा ऑनलाइन वृत्त । बीड

बीडमधील बँक अधिकाऱ्याच्या घरावर आज पहाटे सशस्त्र दरोडा पडला. दरोडेखोरांनी दरोड्यानंतर बँक अधिकाऱ्यासह त्याच्या पत्नीची क्रूरपणे हत्या केली. त्यानंतर या अधिकाऱ्याच्या दोन्ही मुलींवरही धारदार शस्त्राने सपासप वार करून पळ काढला. ऐन सणासुदीच्या तोंडावर घडलेल्या या घटनेमुळं बीड शहरात प्रचंड खळबळ उडाली असून दहशतीचं वातावरण निर्माण झालं आहे.

आदिनाथ घाडगे असं या अधिकाऱ्याचं नाव आहे. ते बीडच्या भवानी अर्बन को-ऑपरेटिव्ह बँकेच्या मुख्य शाखेत प्रमुख वसुली अधिकारी आणि वरिष्ठ व्यवस्थापक आहेत. गेवराईतील सरस्वती कॉलनीत ते राहतात. पहाटे साडेतीनच्या सुमारास दरोडेखोरांनी घाडगे यांच्या घराचा दरवाजा ठोठावला. घाडगे यांच्या पत्नी अलका यांनी दरवाजा उघडल्यानंतर दरोडेखोरांनी धारदार शस्त्राने त्यांच्यावर हल्ला चढवला. त्यानंतर झोपेत असलेल्या आदिनाथ घाडगे, बाळंतपणासाठी आलेली मुलगी वर्षा संदीप जाधव आणि दुसरी मुलगी स्वाती घाडगे यांच्यावरही हल्ला केला. आई-वडिलांच्या विव्हळण्याचा आवाज ऐकून बाजूच्या खोलीत झोपलेल्या वर्षाने आरडाओरड करण्याचा प्रयत्न केला. त्यानंतर दरोडेखोरांनी तिच्यावरही हल्ला केला. बाळाला उराशी कवटाळून वर्षाने दरोडेखोरांनी केलेले वार स्वतः झेलले. या मारहाणीत ती गंभीर जखमी झाली असून तिला पुढील उपचारासाठी औरंगाबादला हलविण्यात आले आहे. घाडगे यांची दुसरी मुलगी स्वाती ही देखील जखमी झाली आहे. या हल्ल्यानंतर दरोडेखोरांनी घाडगे यांच्या घरातील लाखो रुपयांचा ऐवज घेऊन पोबारा केला.

आज पहाटे ही घटना उघडकीस आल्यानंतर घाडगे यांच्या घराबाहेर बघ्यांची प्रचंड गर्दी जमली होती. गणेशोसत्व तोंडावर असताना गेवराईत घडलेल्या या घटनेने कायदा-सुव्यवस्थेचे धिंडवडे निघाले आहेत. पोलीस अधीक्षक जी. श्रीधर यांच्यासह इतर अधिकारी गेवराईत तळ ठोकून असून या प्रकरणाचा अधिक तपास करत आहेत.