Pankaja Munde Corona Positive : पंकजा मुंडे यांना कोरोनाची लागण, ट्विट करत म्हणतात...

बीड : राज्यातील २० आमदार आणि १० मंत्र्यांना कोरोनाची लागण झालेली असताना आणखी एक मोठी बातमी येत आहे. भाजप नेत्या पंकजा मुंडे यांना कोरोनाची लागण झाली आहे. ट्विट करुन आपल्याला कोरोनाची लागण झाली असल्याची माहिती त्यांनी दिली आहे.

राज्यातील कोरोना रुग्णांचा गुणाकार पुन्हा एकदा सुरु झालेला पाहायला मिळतोय. काल परवा पर्यंत दोन तीन हजार कोरोना रुग्णसंख्या असताना अचानकपणे आठ हजारांचा आकडा कोरोनाने ओलांडला आहे. त्यातच राज्यातील बडे नेते, मंत्री, आमदारही कोरोनाच्या विळख्यात सापडल्याचं चित्र आहे.

कोरोनाबाधित लोकांच्या संपर्कात आल्याचं जाणवल्याबरोबर मी विलग झाले आहे. त्यानंतर मी कोरोना चाचणी केली असता लक्षणं आणि कोरोना दोन्हीही आहे, अशी माहिती देताना सर्वांनी काळजी घ्यावी, असं आवाहनही पंकजा मुंडे यांनी केलं आहे.



पंकजा मुंडे यांना दुसऱ्यांदा कोरोनाची लागण झाली आहे. त्यांची प्रकृती सध्या ठीक आहे. त्या सध्या मुंबईतील निवासस्थानी क्वारंटाईन आहेत. त्यामुळे काळजीचं कारण नसल्याचं पंकजा मुंडे यांच्या निकटर्तीयांकडून सांगण्यात आलं आहे.

१० मंत्री, २० आमदारांना कोरोनाची लागण

ठाकरे सरकारमधील अनेकांना कोरोनाची लागण झाली आहे. यामध्ये महसूल मंत्री बाळासाहेब थोरात, महिला आणि बालकल्याण मंत्री यशोमती ठाकूर, शालेय शिक्षण मंत्री वर्षा गायकवाड, ऊर्जा राज्यमंत्री प्राजक्त तनपुरे, आदिवासी विकास मंत्री के सी पाडवी, राष्ट्रवादीच्या खासदार सुप्रिया सुळे यांची कोरोना टेस्ट पॉझिटिव्ह आली आहे.

दुसरीकडे भाजप नेते राधाकृष्ण विखे पाटील, हर्षवर्धन पाटील, डॉ. दीपक सावंत (माजी आरोग्यमंत्री), भाजप खासदार समीर मेघे यांनाही कोरोनाची लागण झाली आहे. राज्यातील १० मंत्री आणि २० आमदारांना कोरोनाची लागण झाली आहे.