पंकजा मुंडेंना परळी बाजार समितीतही धक्का

मटा ऑनलाइन वृत्त । बीड

नगरपरिषदा आणि जिल्हा परिषदेच्या निवडणुकीत पराभवाला सामोरे जावे लागल्यानंतर परळी कृषी उत्पन्न बाजार समितीतच्या निवडणुकीतही राज्याच्या ग्रामविकास मंत्री पंकजा मुंडे यांना पराभवाचा धक्का सहन करावा लागला आहे. राष्ट्रवादीचे नेते आणि विधान परिषदेतील विरोधी पक्षनेते धनंजय मुंडे यांनी पंकजा मुंडे पॅनलवर दणदणीत विजय मिळवित बाजार समितीवर वर्चस्व प्रस्थापित केले आहे.

परळी कृषी उत्पन्न बाजार समितीच्या निवडणुकीच्या निमित्ताने पुन्हा एकदा पंकजा मुंडे आणि धनंजय मुंडे यांच्यात बीडवरील वर्चस्वाची लढाई रंगली होती. या निवडणुकीच्या निमित्ताने दोघांचीही शक्ती पणाला लागली होती. आज सकाळी १० वाजल्यापासून मतमोजणीला सुरूवात झाली आणि समितीवर धनंजय मुंडे यांचेच वर्चस्व राहणार असल्याचे संकेत मिळू लागले. दुपारपर्यंत १८ जागांचे निकाल हाती आले. या निवडणुकीत राष्ट्रवादीच्या पाठबळावर धनंजय मुंडे यांच्या पॅनलने एकुण १४ जागांवर विजय मिळविला. तर भाजपच्या पाठबळावर पंकजा मुंडे यांच्या पॅनलला केवळ ४ जागांवर विजय मिळविता आला. त्यामुळे बीडमध्ये धनंजय मुंडे यांचीच ताकद असल्याचे या निवडणुकीने पुन्हा एकदा अधोरेखित झाले आहे.

परळी बाजार समिती गेल्या ३० वर्षापासून दिवंगत नेते गोपीनाथ मुंडे यांच्याच ताब्यात होती. गोपीनाथ मुंडे यांच्या नेतृत्वाखाली त्यांचे मोठे बंधू पंडितअण्णा मुंडे हेच या बाजार समितीचा कारभार सांभाळायचे. पंडित अण्णांनी बंडखोरी केल्यानंतर या बाजार समितीवर धनंजय मुंडेंनी एक हाती अंमल ठेवला. आता गोपीनाथ मुंडे आणि पंडितअण्णा हयात नाहीत. त्यांच्या पश्चात होणाऱ्या या निवडणुकीत पंकजा मुंडे यांनी आपल्या पॅनलला गोपीनाथ मुंडे यांचे नाव दिले आहे, तर धनंजय यांनी आपल्या पॅनलला पंडितअण्णा यांचे नाव दिले होते.