अंगणवाडी सेविकांच्या ग्रुपवर अश्लिल फोटो पाठवणाऱ्या अधिकाऱ्यांचे निलंबन

बीडः अंगणवाडी सेविकांच्या व्हॉट्सअॅप ग्रुपवर अश्लिल फोटो टाकणाऱ्या अधिकाऱ्याचे निलंबन करण्याचे आदेश महिला व बाल विकास मंत्री यशोमती ठाकूर यांनी दिले आहेत.

काही दिवसांपूर्वी अंगणवाडी सेविकांच्या ग्रुपवर महिला व बाल कल्याण अधिकाऱ्यानं अश्लिल फोटो व अक्षेपार्ह कमेंट केल्या होत्या. या अधिकाऱ्यावर लगेचच कारवाई करण्याची मागणी अंगणवाडी सेविकांकडून होत होती. यावर तातडीने लक्ष घालून महिला व बाल विकास मंत्री यशोमती ठाकूर यांनी निलंबनाची कारवाई केली आहे. तसा व्हिडिओच त्यांनी ट्विट केला आहे.



या अधिकाऱ्याचं तातडीने निलंबन केलं असून त्याच्यावर कारवाईचे आदेश देण्यात आले आहेत. तसंच या प्रकरणात त्याची पाठराखण करणाऱ्या व्यक्तींवरही कारवाई करण्यात येईल, अशा ईशारा यशोमती ठाकूर यांनी दिला आहे.

दरम्यान, यशोमती ठाकूर यां संकटाच्या काळात प्रत्यक्ष ग्राउंड फिल्डवर काम करत आहेत. पालघर जिल्ह्यातील वाडा व विक्रमगड तालुक्यांतील अंगणवाड्यांची पाहणी करण्यासाठी सोमवारी त्यांनी हजेरी लावली.

रेस्क्यू फाऊंडेशनला भेट

यशोमती ठाकूर यांनी बोईसरजवळील लालोंडे गावच्या फुलांचा पाडा येथे असलेल्या रेस्क्यू फाऊंडेशनच्या बालसुधागृहाला भेट देऊन तेथील कामाची पाहणी करून आढावा घेतला. ठाकूर यांनी यावेळी येथील मुलींशी संवाद साधत त्यांच्या अडचणी तसेच, येथील अधिकारी व कर्मचाऱ्यांशी चर्चा करून तेथील समस्या जाणून घेतल्या.