राष्ट्रवादीचा धडाका; बीड जिल्ह्यातील पाच उमेदवार जाहीर

बीड: आमदार, खासदार पक्ष सोडून जात असल्यानं काहीशा बॅकफूटवर गेलेल्या राष्ट्रवादी काँग्रेसनं आगामी विधानसभा निवडणूक आक्रमकपणे लढण्याचा निर्धार केल्याचं दिसत आहे. पक्षाचे अध्यक्ष शरद पवार हेच त्यासाठी मैदानात उतरले असून त्यांनी आज बीड जिल्ह्यातील पाच उमेदवारांच्या नावाची अचानक घोषणा करत सर्वांनाच आश्चर्याचा धक्का दिला. सत्ताधारी भाजप-शिवसेनेला टक्कर देण्याच्या हेतूने राष्ट्रवादीने धनंजय मुंडे यांच्यासह सर्व तुल्यबळ मोहरे मैदानात उतरवले आहेत.

शरद पवार सध्या राज्याच्या दौऱ्यावर असून कार्यकर्त्यांशी संवाद साधत आहेत. बीड जिल्ह्यात आज पवारांनी विधान परिषदेतील विरोधी पक्षनेते धनंजय मुंडे यांच्यासह प्रमुख पदाधिकारी व नेत्यांशी चर्चा केली. त्यानंतर झालेल्या एका पत्रकार परिषदेत त्यांनी आगामी निवडणुकीसाठी बीड जिल्ह्यातील पाच उमेदवारांच्या नावाची घोषणा केली. त्यानुसार, परळीतून धनंजय मुंडे, गेवराईतून विजयसिंह पंडित, बीडमधून संदीप क्षीरसागर, माजलगावातून माजी मंत्री प्रकाश सोळंके व केजमधून नमिता मुंदडा राष्ट्रवादीच्या तिकिटावर लढणार आहेत.

परळीत भावा-बहिणींमध्ये लढत, बीडमध्येही चुरस

भाजप-शिवसेनेच्या आक्रमक राजकारणाला शह देण्यासाठी पवारांनी अत्यंत काळजीपूर्वक उमेदवारांची निवड केली आहे. परळीतून धनंजय मुंडे निवडणूक लढणार आहेत. हा पंकजा मुंडे यांचा मतदारसंघ आहे. त्यामुळं इथं भावा-बहिणीमध्ये चुरशीची लढत होण्याची शक्यता आहे. तर, राष्ट्रवादी सोडून शिवसेनेचे 'बंधन' बांधणाऱ्या जयदत्त क्षीरसागर यांना कात्रजचा घाट दाखवण्यासाठी पवारांनी खेळी केली आहे. जयदत्त क्षीरसागर यांच्या विरोधात राष्ट्रवादीनं त्यांचा पुतण्या संदीप यांना उमेदवारी दिली आहे. त्यामुळं इथंही चुरशीची लढत होणार आहे.