दारू तस्कराचा भररस्त्यात होरपळून मृत्यू

मटा ऑनलाइन वृत्त । बीड

दुचाकीवरून दारूचा साठा नेत असताना समोरून आलेल्या दुसऱ्या दुचाकीने जोरदार धडक दिली. त्यामुळे दोन्ही दुचाकींनी अचानक पेट घेतल्याने दारूची तस्करी करणाऱ्या इसमाचा भर रस्त्यात होरपळून मृत्यू झाला. माजलगाव येथील राष्ट्रीय महामार्गावर हा विचित्र अपघात घडला.

माजलगाव शहरापासून ३ किमी अंतरावर असलेल्या राष्ट्रीय महामार्गावरील दुगड पेट्रोल पंपाजवळ ही घटना घडली. राष्ट्रीय महामार्गावरील दारूची दुकाने व बिअरबार बंद झाल्यापासून माजलगाव शहरात व तालुक्यात मोठ्या प्रमाणात दारूची तस्करी केली जात आहे. माजलगावमध्ये आज अशीच एक विचित्र घटना घडली आहे. दारूच्या बाटल्या घेऊ येणाऱ्या एका दुचाकीस्वाराची आणि दुसऱ्या एका दुचाकीस्वाराची समोरासमोर धडक झाली. पेट्रोल पंपाजवळ घडलेल्या या अपघातात दोन्ही बाईक्सने पेटल्या. त्यापैकी दारूची तस्करी करणारा तरूण बाईकखाली अडकल्याने त्याचा या विचित्र अपघातात होरपळून मृत्यू झाला. तर दुसरा बाईकस्वार नितीन जयस्वाल हा गंभीर जखमी झाला असून त्याला उपचारासाठी माजलगाव ग्रामीण रूग्णालयात दाखल करण्यात आले. त्यानंतर त्याला बीड येथील शासकीय रुग्णालयात हलविण्यात आले. या अपघातात होरपळून ठार झालेल्या व्यक्तीची अद्याप ओळख पटलेली नाही. अपघाताची माहिती मिळताच माजलगाव ग्रामीण पोलीस ठाण्याचे सहाय्यक पोलीस निरीक्षक बी.ए. कदम, सहाय्यक पोलीस उपनिरीक्षक डि.डि.मांडवे आणि पोलीस जमादार पी.के.खोडवे यांनी घटनास्थळी धाव घेतली. याबाबतचा अधिक तपास सुरू असल्याचं पोलिसांनी सांगितलं.