बीडमधील गावाचा कायापालट करणार खा. सचिन

बीडः दुष्काळग्रस्त कऱ्हेवाडीचे (ता. आष्टी) रूपडे लवकरच बदलणार आहे. मास्टरब्लास्टर खासदार सचिन तेंडुलकर याने त्यासाठी आर्थिक मदत देऊ केली. जिल्ह्यातील दुष्काळीस्थितीची जिल्हा प्रशासनाकडून माहिती घेतल्यानंतर तेंडुलकरच्या स्वीय सहाय्यकाने प्रत्यक्ष पाहणी केली होती. कऱ्हेवाडी ग्रामस्थांशी चर्चा करून दुष्काळी झळाही जाणून घेतल्या. त्यानंतर तेंडुलकरने बीडचे जिल्हाधिकारी नवलकिशोर राम यांना पत्राद्वारे खासदारनिधीबाबत कळवले आहे.

कऱ्हेवाडीत पायाभूत सुविधा देणे तसेच, पाणी पातळी वाढण्यासाठीच्या खर्चाचे अंदाजपत्रक तयार करण्याचे सचिनने जिल्हा प्रशासनाला कळवले आहे. विकास कामासाठी सचिनसारखा पालक मिळाल्याने ग्रामस्थांनी समाधान व्यक्त केले आहे. बीडच्या दुष्काळाची दखल घेऊन सचिनने स्वीय सहाय्यक नारायण कन्हान यांना फेब्रुवारी बीडमध्ये पाठवले होते. त्यांनी जिल्हा प्रशासनाच्या सहाय्याने आष्टी आणि पाटोदा तालुक्याला भेट दिली. पाटोदा तालुक्यातील कुसळंब आणि आष्टी तालुक्यातील कऱ्हेवाडी या दोन गावांना भेटी दिल्या. यावेळी पाणी, चारा, रोजगार, दळणवळण, रस्त्यांची उपलब्धता यांविषयी चर्चा केली. तसेच कुठल्या प्रकारची मदत दिली जावी याची माहिती कन्हान यांनी घेतली होती.