मरायला घाबरत नाही! FBवर स्टेटस ठेवलं; दुसऱ्याच दिवशी तरुणाचा संशयास्पद मृत्यू, बीडमध्ये खळबळ

बीड: 'मी मारायला आणि मरायला पण घाबरत नाही', असं फेसबुक स्टेटस ठेवणाऱ्या तरुणाचा संशयास्पद मृत्यू झाल्याची धक्कादायक घटना बीडमध्ये घडली आहे. घरुन दुचाकीघेऊन दूध घालण्यासाठी निघालेला तरुण मृतावस्थेत आढळल्याने संपूर्ण बीडमध्ये खळबळ माजली आहे.

बीडच्या पाटोदा तालुक्यातील जाधव वस्ती येथे ही घटना घडली आहे. कृष्णा दिलीप जाधव (वय १८) असं मृत तरुणाचं नावं आहे. याप्रकरणी पाटोदा पोलीस ठाण्यात अकस्मात मृत्यूची नोंद करण्यात आली आहे. मात्र, कुटुंबीयांनी याप्रकरणी घातपाताचा संशय व्यक्त केला आहे.

मी मरायला घाबरत नाही आणि मारायलाही घाबरत नाही, कृष्णाची फेसबुक पोस्ट

पाटोदा तालुक्यातील जाधव वस्तीतील कृष्णा जाधव हा दररोज सकाळी घरचे दूध लिंबादेवी फाटा येथे विक्रीसाठी दुचाकीवरून जात असत. त्याने रात्री उशिरा सोशल मीडियावर ‘मी मरायला घाबरत नाही आणि मारायलाही घाबरत नाही... कोण पण समोर येऊ दे...’ असे स्टेटस ठेवले होते. सकाळी कृष्णा नेहमीप्रमाणे घरातील दूध घेऊन दुचाकीवरून (एमएच १२ सीयू २९१३) लिंबादेवी फाट्यावरील डेअरीकडे निघाला होता.

ग्रामस्थांना कृष्णा गंभीर अवस्थेत सापडला

सकाळी सात वाजेच्या सुमारास निरगुडी ते लिंबादेवीदरम्यानच्या परिसरातून पुलाजवळून जाणाऱ्या काही ग्रामस्थांना कृष्णा हा गंभीर अवस्थेत पडल्याचे दिसून आला. त्याला तातडीने बीड जिल्हा रुग्णालयात दाखल करण्यात आले. त्याच्या डोक्याला आणि उजव्या हाताच्या खांद्याजवळही गंभीर दुखापत झाली असल्याने त्याला बीड जिल्हा रुग्णालयात दाखल करण्यात आल्यानंतर डॉक्टरांनी तपासून मृत घोषित केले.

कुटुंबीयांना घातपाताचा संशय

घटनास्थळावर दूध सांडलेलं होतं, तर दुचाकीचं किरकोळ नुकसान झालं होतं. ते पाहून कुटुंबीयांनी हा अपघाती मृत्यू नसून कृष्णाचा घातपात झाल्याचा दावा केला आहे. यापरकरणी पोलीस सध्या तपास करत आहेत.