आधारभूत केंद्रांवर सीसीटीव्हीची नजर; केंद्रचालकांना पणन विभागाचे निर्देश

भंडारा : आधारभूत धान खरेदी केंद्रांवर होणाऱ्या अनियमिततेला लगाम घालण्यासाठी आता प्रत्येक आधारभूत केंद्रांवर सीसीटीव्ही लावण्याचे निर्देश जिल्ह्यातील सर्व आधारभूत केंद्रचालकांना देण्यात आले आहे. सीसीटीव्हीतील रेकॉर्डिंग मागणीनुसार उपलब्ध करुन द्यावी, अशा सूचनाही देण्यात आल्या आहेत.

खरीप आणि रब्बी हंगामातील धान खरेदीसाठी दरवर्षी आधारभूत केंद्र सुरू केले जातात. या खरेदी केंद्रांवर दरवर्षी अनियमितता होत असल्याचा प्रकार वारंवार उघडकीस आला आहे. कोट्यवधींचा धान घोटाळासुद्धा उजेडात आला आहे. या घोटाळ्याप्रकरणी अनेक केंद्रांवर कारवाईसुद्धा करण्यात आली आहे. तरीसुद्धा धान खरेदी केंद्रांवर होणाऱ्या अनियमिततेमध्ये सुधारणा झालेली नाही.

या पार्श्वभूमीवर शासनाने दिलेल्या निर्देशानुसार जिल्हा पणन विभागाने जिल्ह्यातील सर्व आधारभूत केंद्र चालकांना धान खरेदी केंद्रांवर सीसीटीव्ही लावण्याचे निर्देश दिले आहे. सीसीटीव्ही कॅमेऱ्याच्या रेकॉर्डिंगमध्ये धान मोजणी करणाऱ्या शेतकऱ्यांचे फोटो व्यवस्थित दिसेल अशाप्रकारे सीसीटीव्ही लावावे, तसेच केंद्रावर लावण्यात आलेल्या सीसीटीव्ही कॅमेरे ऑनलाइन करून त्याची एक लिंक जिल्हा पणन कार्यालयाला पाठवावे. धान खरेदी केंद्रांवर सीसीटीव्ही कॅमेरे न लावण्यास व त्याअनुषंगाने प्रशासकीय कारवाई झाल्यास त्याची सर्वस्वी जबाबदारी संबंधित संस्थेची राहील, अशाही सूचना जिल्हा पणन अधिकाऱ्यांनी केंद्रचालकांना दिल्या आहेत.

तथापि, आधारभूत केंद्रांवर दरवर्षी शेतकऱ्यांची होरपळ होते. अनेक उपाययोजना करुनही शेतकऱ्यांना अनेक त्रासाला सामोरे जावे लागते. आधारभूत केंद्रांवर समस्या दूर करण्याच्या नादात त्याचा फटका शेतकऱ्यांनाच सहन करावा लागतो. आता सीसीटीव्हीचा नियम लादल्याने त्याचा खर्च केंद्र चालकांना बसणार आहे.