ट्रकच्या धडकेत प्राध्यापिकाचा मृत्यू; दुचाकीने शाळेत जाताना घडली घटना

भंडारा : चुलतभावासोबत दुचाकीने शाळेत जाताना भरधाव ट्रकने धडक दिल्याने प्राध्यापिका ठार झाल्याची घटना साकोली तालुक्यातील सेंदूरवाफाजवळील कपुरी नाल्याजवळ घडली. रिना प्रभाकर मस्के (३६, रा. पंचशील वॉर्ड, साकोली), असे मृत प्राध्यापिकेचे नाव आहे.

अशी आहे घटना

सडक-अर्जुनी तालुक्यातील कोकणा येथील अवधूत आश्रम कनिष्ठ महाविद्यालयात विज्ञान विषयाच्या प्राध्यापिका म्हणून कार्यरत होत्या. सकाळच्या सुमारास चुलतभावासोबत दुचाकीने (एमएच ३५ एपी १४२८) साकोली येथून कोकणाकडे जात होत्या. राष्ट्रीय महामार्गावर सेंदूरवाफा टोलनाक्याजवळ कपुरी नाल्यासमोर भरधाव ट्रकने त्यांच्या दुचाकीला धडक दिली. त्यात रिना यांच्या डोक्याला गंभीर दुखापत झाली. त्यांना तत्काळ उपचारासाठी साकोली येथे दाखल करण्यात आले. मात्र प्रकृती गंभीर असल्याने नागपूर येथे उपचारासाठी नेत असताना त्यांचा जांभळी सडक येथे वाटेतच मृत्यू झाला.