ठाकरेंकडून हकालपट्टी, शिंदेंकडून मलमपट्टी, खासदार प्रतापराव जाधवांना 'स्पेशल गिफ्ट'

बुलडाणा : शिवसेना पक्षप्रमुख उद्धव ठाकरे (Uddhav Thackeray) यांच्या आदेशानुसार बुलडाणा जिल्हा शिवेसना संपर्कप्रमुख पदावरून प्रतापराव जाधव (Prataprao Jadhav) यांची शिवसेना मध्यवर्ती कार्यालयाने हकालपट्टी केली होती, मात्र मुख्यमंत्री आमदार एकनाथ शिंदे यांनी दिल्लीहून पुनश्च प्रतापराव जाधव यांची बुलडाणा जिल्हा शिवसेना संपर्कप्रमुखपदी नियुक्ती केली. त्यांच्याकडे जिल्ह्यातील सर्व पदांच्या नेमणुकीचे अधिकार देत एकनाथ शिंदे यांनी एकप्रकारे 'स्पेशल गिफ्ट'च दिल्याची चर्चा आहे.महाराष्ट्र सदन दिल्ली येथे काल मुख्यमंत्री एकनाथ शिंदे यांनी खा. प्रतापराव जाधव यांची बुलडाणा जिल्हा शिवसेना संपर्कप्रमुख पदी पुनश्च नियुक्ती केली आहे. तसेच जिल्ह्यातील पदाधिकाऱ्यांची नियुक्ती करण्याचे अधिकार त्यांनाच बहाल केले आहेत. याप्रसंगी खा. प्रतापराव जाधव यांचा मुख्यमंत्री एकनाथ शिंदे यांनी या प्रसंगी सत्कार केला. यावेळी लोकसभेतील गटनेते खा. डॉ. राहुल शेवाळे, खा. हेमंत पाटील, खा. कृपाल तुमाने, खा. धैर्यशील माने, खा. सदाशिव लोखंडे उपस्थित होते.

हेही वाचा : तेव्हा माझे हातपाय हलणं बंद झालं होतं, बोटंही हलत नव्हती; उद्धव ठाकरेंनी सांगितला सगळ्यात वेदनादायी अनुभव

शिवसेनेच्या १२ खासदाररांनी १९ जुलैला गट तयार करून एक पत्र लोकसभा अध्यक्षांना दिले. यावेळी त्यांनी मुख्यमंत्री एकनाथ शिंदे गटाला पाठिंबा दिला होता. त्यांनी शिंदे गटाला पाठींबा दिल्यानंतर जिल्ह्यातील घाटाखालील काही शिवसेना पदाधिकारी यांनी पत्रकार परिषद घेतली. जिल्हा प्रमुख शांताराम दाणे यांनी आम्ही खासदार प्रतापराव जाधव यांच्यासोबत असल्याचे जाहीर केले होते.

हेही वाचा : Uddhav Thackeray: नियतीनेच तुम्हाला पुन्हा 'मातोश्री'वर नेलं का? उद्धव ठाकरे म्हणाले...

सामना मध्यवर्ती कार्यालयातून प्रसिद्धीस दिलेल्या पत्रकात जिल्हा संपर्क प्रमुख खासदार प्रतापराव जाधव यांची जिल्हा संपर्क प्रमुख पदावरून तर जिल्हा प्रमुख शांताराम दाणे (मलकापूर जळगांव जामोद विधानसभा) उपजिल्हा प्रमुख राजु मिरगे, उपजिल्हा प्रमुख संजय अवताडे, तालुका प्रमुख नांदुरा संतोष डीवरे, तालुका प्रमुख मलकापूर विजय साठे, तालुका प्रमुख शेगांव रामा थारकार यांची पक्ष विरोधी कारवाई केल्यामुळे शिवसेना पक्षप्रमुख उद्धव ठाकरे यांच्या आदेशाने शिवसेनेतून हकालपट्टी करण्यात आली होती.

हेही वाचा : शिवसेनेबाबत विश्वासघाताचं राजकारण वारंवार का? उद्धव ठाकरेंनीच सांगितलं काय चुकतंय