भाजपच्या सरपंचाकडून मुलींची छेडछाड, भावंडांकडून भरचौकात चोप, चंद्रपुरात खळबळ

चंद्रपूर : बहिणीची छेड काढणाऱ्या सरपंचाला भावंडांनी चोप दिला. चंद्रपूरमध्ये गोंडपिपरी शहरातील भर चौकात ही घटना घडली. या घटनेने राजकीय वर्तुळात खळबळ उडाली आहे. विशेष म्हणजे सरपंच निलेश पुलगमकर हे भाजपचे पदाधिकारी आहेत. या प्रकाराची तक्रार अद्याप पोलीस स्टेशनला दिलेली नाही.

हिवरा गावाचे सरपंच तथा भाजप पदाधिकारी निलेश पुलगमकर याने बसमध्ये मुलींची छेड काढली. ही बाब मुलींनी भावंडांना सांगितली. भावांचा संताप अनावर झाला होता. अशात सरपंच हे तहसील कार्यालय परिसरात असल्याची माहिती भावंडाना मिळाली.

भावंडांनी गोंडपिपरी तहसील कार्यालय गाठले. सरपंच पुलगमकार यांची धुलाई केली. सरपंचाची धुलाई झाल्याची वार्ता गोंडपिपरी तालुक्यात वाऱ्यासारखी पसरली. विशेष म्हणजे धुलाई करताना अनेकांनी बघितलं. मात्र सरपंचाला सोडवायला कुणीच गेलं नाही.

हेही वाचा : अल्पभूधारक शेतकरीपुत्र झाला पॅराकमांडो; मुलाच्या आयुष्यातील संघर्ष मांडताना माऊलीला अश्रू अनावर

या घटनेची तालुक्यात खमंग चर्चा सुरू आहे. समाजमाध्यमात सरपंचाची चांगलेच चिमटे काढले जात आहेत. दरम्यान माझ्यावर राजकीय वैमनस्यातून हल्ला करण्यात आला. मी कोणत्याही मुलीची छेडछाड केली नाही. माझ्यावर खोटा आरोप लावत आहे. याची कुठेही तक्रार नाही, असे पुलगमकर म्हणाले.

याआधी, अल्पवयीन अभिनेत्रीचा विनयभंग केल्याप्रकरणी तरुणाला तीन वर्षांचा कारावास ठोठावण्यात आल्याचं नुकतंच समोर आलं होतं. १६ वर्षीय मराठी अभिनेत्रीसोबत छेडछाड केल्याने विशेष पॉस्को कोर्टाने बुधवारी ३२ वर्षीय आरोपीला शिक्षा सुनावली. जानेवारी २०१९ मध्ये मुंबईतील दादर रेल्वे स्टेशनवर ठाण्याला जाणारी लोकल ट्रेन पकडताना पीडित अल्पवयीन मुलीचा आरोपीने विनयभंग केल्याचा आरोप होता.

गोरेगावहून ठाण्याला जाण्यासाठी दादर रेल्वे स्थानकात पीडित मुलीने लोकल बदलली होती. पश्चिम रेल्वेहून मध्य रेल्वे मार्गावर आल्यानंतर ठाण्याची ट्रेन पकडताना हा प्रकार घडला होता.

हेही वाचा : मंत्र्यांनी, नेत्यांनी महिलांचा मान ठेवावा; चित्रा वाघ यांचे परखड मत

आपल्या साक्षीत मुलीने सांगितले होते की घटनेच्या वेळी ती इयत्ता बारावीत शिकत होती, तसंच एका प्रसिद्ध मराठी मालिकेत काम करत होती. तक्रारदार मुलगी ठाण्यात राहते, तर २०१९ मध्ये घरुन गोरेगावला ती मालिकेच्या शूटिंगसाठी जात असे.