पार्किंगमध्ये मद्यधुंद तरुणाचा मृत्यू, शरीराची चाळण, सीसीटीव्ही फूटेजने अखेर गूढ उकललं

चंद्रपूर : दोन दिवसांपूर्वी चंद्रपुरात एका युवकाचा अपघाती मृत्यू झाला होता. आता युवकाच्या मृत्यूचे कारण पुढे आले अन् पोलिसही हादरले. सीसीटीव्हीमध्ये कैद झालेले दृश्य बघून पोलिसांच्याही अंगावर काटे उभे राहिले आहेत. मद्यधुंद अवस्थेत रस्त्यावरुन चालणाऱ्या तरुणाला आधी कारने चिरडले, तर नंतर आणखी एक वाहन त्याच्या अंगावरुन गेले.

उमंग निळकंठ दहीवले असे मयत युवकाचे नाव आहे. तो चंद्रपुरातील रघुवंशी कॉम्प्लेक्स परिसरातील पार्किंगमध्ये मद्यधुंद अवस्थेत पडून होता. सुरुवातीला एका चारचाकी गाडी त्याला चिरडले. काही वेळानी आणखी एक चारचाकी वाहन त्याच्या शरीरावरुन गेले. यातच त्याचा दुर्दैवी मृत्यू झाल्याचा अंदाज आहे.

चंद्रपूर शहरातील मध्यभागात असलेल्या रघुवंशी कॉम्प्लेक्स परिसरातील पार्किंगमध्ये मद्यधुंद अवस्थेत पडून असलेल्या युवकाचा मृत्यू झाल्याची घटना सकाळच्या वेळेस उघडकीस आली होती. मृत युवकाचे नाव उमंग नीलकंठ दहिवले असून तो शहरालगत असलेल्या देवडा गावातील महाकाली नगरीतील रहिवाशी आहे.

घटनेची माहिती मिळताच शहर पोलीस निरीक्षक सुधाकर अंभोरे घटना स्थळी पोहचले, या प्रकरणाचा तपास करताना पोलिसांनी सीसीटीव्ही तपासले असता अंगाचा थरकाप उडवणारे दृश्य पाहायला मिळाले. त्या तरुणाच्या शरीरावरून एकापाठोपाठ एक अशी दोन चारचाकी वाहने गेल्याने त्याचा मृत्यू झाल्याचे समोर आले.

हेही वाचा : आता हेच तुझे बाबा, नवऱ्याला सोडून प्रियकरासोबत राहिली, पण एका इच्छेमुळे मायलेकाचा जीव गेला

पोलिसांनी दोन्ही वाहन चालकांवर सदोष मनुष्यवधाचा गुन्हा दाखल करून त्यांना अटक केली. प्रतीक बालाजी वाभीटकर, जितेश गोपाल विरानी अशी अटकेतील आरोपींची नावे आहेत. दोन्ही चारचाकी वाहने शहर पोलिसांनी जप्त केली आहेत.

हेही वाचा : लेक बुडू लागली, बापाचं काळीज गलबललं, पोहता येत नसूनही पाण्यात उडी; पण आईच्या डोळ्यादेखतच...