मुख्यमंत्री ठाकरे शनिवारी नंदुरबारला
विविध विकासकामांचे उद्घाटन करणार
म. टा. वृत्तसेवा, धुळे
नंदुरबार नगरपालिकेने नवीन बांधलेल्या जलतरण तलावाचे उद्घाटन व नगरपालिकेच्या नियोजित इमारतीच्या जागेचा भूमिपूजन सोहळा यासाठी शनिवारी (दि. १५) मुख्यमंत्री उद्धव ठाकरे येणार असल्याची माहिती मंगळवारी (दि. ११) माजी आमदार चंद्रकांत रघुवंशी यांनी पत्रकार परिषदेत दिली.
या वेळी रघुवंशी म्हणाले, मुख्यमंत्री उद्धव ठाकरे हे शनिवारी (दि. १५) सकाळी ११ वाजता येणार असून, जिल्हा पोलिस कवायत मैदानावर हेलिकॉप्टरने त्यांचे आगमन होणार आहे. नंतर जलतरण तलाव व नगरपालिकेच्या नियोजित इमारतीच्या जागेचे भूमिपूजन होईल. यानंतर शहरातील जीटीपी महाविद्यालयाच्या मैदानावर मुख्यमंत्री ठाकरे यांची जाहीर सभा होणार आहे. या वेळी शिवसेना खासदार संजय राऊत, कृषिमंत्री दादा भुसे, खासदार हीना गावित, आमदार राजेश पाडवी, डॉ. विजयकुमार गावित, आदिवासी विकास मंत्री के सी पाडवी, जिल्हा अधिकारी डॉ. राजेंद्र भारूड, जिल्हा पोलिस अधीक्षक महेंद्र पंडित यांच्यासह सर्व लोकप्रतिनिधी महाविकास आघाडीचे पदाधिकारी उपस्थित राहणार आहेत. या दौऱ्यावेळी जिल्ह्यातील प्रलंबित विकासकामांबाबत आपण मुख्यमंत्री उद्धवजी ठाकरे यांच्याकडे मागणी करणार असल्याचे त्यांनी सांगितले.
तापी सूतगिरणी उद्घाटनास मुहूर्त; शरद पवारांची उपस्थिती
जळगाव : चोपडा येथील तापी शेतकरी सहकारी सूतगिरणीचे उद्घाटन शनिवारी (दि. १५) माजी केंद्रीय कृषिमंत्री शरद पवार यांच्या हस्ते होणार आहे. याबाबत मंगळवारी (दि. ११) कार्यक्रमाच्या तयारीला वेग आला आहे. सूतगिरणीच्या कार्यस्थळावर मान्यवरांकडून तयारीचा मंगळवारी (दि. ११) आढावा घेण्यात आला. या वेळी प्रा. अरुण गुजराथी, चेअरमन कैलास पाटील, व्हाइस चेअरमन पी. बी. पाटील, संचालक तुकाराम पाटील, प्रकाश रजाळे, के. डी. चौधरी, रंजना नेवे, उद्योजक आशिष गुजराथी, राजेंद्र पाटील, मॅनेजर विजय पाटील, सुकुमार काळे उपस्थित होते. पवार यांना नुकतीच धमकी दिल्याची घटना घडल्याने कार्यक्रमात चोख पोलिस बंदोबस्त ठेवला जाणार आहे. त्यासाठी जिल्हा पोलिस अधीक्षक पंजाबराव उगले, अप्पर पोलिस अधीक्षक सचिन गोरे, चोपडा विभागाचे उप अधीक्षक सौरव अग्रवाल, पोलिस निरिक्षक विनायक लोकरे उपस्थित होते. या सोहळ्याच्या अध्यक्षस्थानी कामगार मंत्री दिलीप वळसे-पाटील राहणार आहेत. चोपडा तालुक्याचा महत्त्वाकांक्षी प्रकल्प असलेल्या २५ हजार चात्यांच्या तापी शेतकरी सहकारी सूतगिरणीमुळे शेकडो युवकांना रोजगार उपलब्ध झाला आहे.