रास्ता रोको प्रकरणी चाळीस जणांविरुद्ध गुन्हा दाखल

धुळे : धुळे तालुक्यातील मुकटी गावालगत राष्ट्रीय महामार्ग क्रमांक सहावर रविवारी (दि. २६) सुमो आणि ट्रक यामध्ये झालेल्या अपघातानंतर मुकटी गावातील ग्रामस्थांनी महामार्गावर रास्ता रोको आंदोलन केले होते. महामार्गावरील खड्डे बुजविण्याची मागणी यावेळी नागरिकांनी केली होती.

आंदोलकांनी सार्वजनिक बांधकाम विभागातील शासकीय अधिकाऱ्यांशी हुज्जत घालून, शिवीगाळ व दमदाटी केली. तसेच जिल्हाधिकाऱ्यांच्या आदेश केलेल्या जमावबंदीचे उल्लंघन करीत शासकीय कामात अडथळा आणल्याप्रकरणी आंदोलन करणाऱ्यांपैकी चाळीस जणांविरुद्ध तालुका पोलिस ठाण्यात गुन्हा दाखल करण्यात आला आहे. याप्रकरणी पोलिस कर्मचारी बी. बी. चौधरी यांनी फिर्यादीवरून तालुका पोलिस ठाण्यात मुकटी येथील उमाकांत पाटील, सुदाम पाटील, हर्षल साळुंखे, शरद साळुंखे, भरत साळुंखे यांच्यासह अन्य जणांविरुद्ध गुन्हा नोंदविण्यात आला आहे.