ग. स. चे गटनेते देसले यांना अटक

आर्थिक घोटाळ्यातून धुळ्यात पोलिसांची कारवाई

म. टा. वृत्तसेवा, धुळे

शहरातील धुळे व नंदुरबार जिल्हा ग. स. बँकेत तब्बल ५ कोटी ४९ लाख रुपयांच्या गैरव्यवहार प्रकरणी शहर पोलिसांनी गुरुवारी (दि. ११) बँकेचे गटनेते चंद्रकांत नारायण देसले (सी. एन. देसले) यांना अटक केली आहे.

बँकेत झालेल्या आर्थिक घोटाळ्यात त्यांचा सहभाग असल्याचे आढळून आल्याने देसले यांना अटक करण्यात आल्याची माहिती पोलिस निरीक्षक गणेश चौधरी यांनी दिली. गेल्या महिन्यात धुळे शहर पोलिस ठाण्यात देसले यांच्यासह विद्यमान संचालक मंडळ आणि बँक अधिकाऱ्यांसह ४६ जणांविरुद्ध गुन्हा दाखल करण्यात आला होता. धुळे व नंदुरबार जिल्हा सरकारी नोकरांची सहकारी बँक अर्थात ग. स. बँकेत सन २००८-०९, ०९-१० व २०१५-१६ या आर्थिक वर्षात ४ कोटी ४४ लाख ५३ हजार २०५ रुपये तर दुसरा गैरव्यवहार १ कोटी ४ लाख ६५ हजार रुपयांचा करण्यात आला. सभासदांची व आरबीआयची फसवणूक तसेच एटीएमच्या खरेदीतील घोटाळ्याप्रकरणी सरकारी ऑडिटर वसंत प्रभाकर राठोड (रा. आनंद नगर, देवपूर, धुळे) यांनी फिर्याद नोंदवली होती. त्यानुसार पोलिस पथकाने गुरुवारी सकाळी अचानकपणे सी. एन. देसले यांना ताब्यात घेतले. दुपारी १ वाजेनंतर शहर पोलिस ठाण्यात आणून देसले यांची सायंकाळी उशिरापर्यंत चौकशी करण्यात आली. यामध्ये बँकेच्या आर्थिक घोटाळ्यात चंद्रकांत देसले यांचा सहभाग दिसून आल्याने त्यांना अटक करण्यात आली.