शहीद योगेश भदाणे यांचे पार्थिव मूळ गावी दाखल

धुळे: राजौरी जिल्हयात सुंदरबनी सीमेवर पाकिस्तानच्या गोळीबारात शहीद झालेले धुळ्याचे जवान योगेश मुरलीधर भदाणे यांचे पार्थिव त्यांचे मूळ गाव खलाणेमध्ये दाखल झाले आहे. योगेश भदाणे यांचे पार्थिव पोहोचताच त्यांच्या कुटुंबीयांसह गावकऱ्यांना शोक अनावर झाला.

संरक्षण राज्यमंत्री डॉ. सुभाष भामरे यांनी लष्कराचे विमान थेट धुळ्यात आणण्यासाठी विशेष प्रयत्न केले होते. शहीद योगेश भदाणे हे जम्मू-काश्मीरमध्ये १०८ इंजिनिअर रेजिमेंटमध्ये कर्तव्य बजावत होते. बांदीपुरा भागात सीमेवर तैनात असताना पाकिस्तानने केलेल्या गोळीबारात ते शहीद झाले.

योगेश भदाणे हे २००९ मध्ये लष्करात दाखल झाले होते. भदाणे यांचे दोघे मेहुणेही लष्करात आहेत. योगेश यांचा विवाह अवघ्या सात महिन्यांपूर्वीच झाला होता. या घटनेमुळे धुळे जिल्ह्यात शोककळा पसरली आहे.