म. टा. प्रतिनिधी, जळगाव सतराव्या लोकसभा निवडणुकीसाठी पुण्यासारख्या शहराने फक्त ४९.८४ टक्के मतदान केले असताना, चौथ्या टप्प्यात खान्देशातून धुळे व नंदुरबारमध्ये भरघोस मतदान करून मतदारांनी जणू मतोस्तसवच साजरा केला. सांयकाळी ६ वाजेपर्यंत मिळालेल्या आकडेवारीनुसार धुळे मतदारसंघात ५८ टक्के, तर नंदुरबार मतदासंघात ६८ टक्के मतदान झाले. गेल्यावेळच्या तुलनेत धुळ्यात जैसे थे परिस्थिती, तर नंदुरबारला मतदानात चांगला उत्साह दिसून आला. नंदुरबारला राज्यातील उच्चांकी मतदान टक्केवारी नोंदविण्यात आली. खान्देशातील धुळे व नंदुरबार मतदारसंघासाठी सोमवारी (दि. २९) मतदान झाले. धुळ्यात २,११५ तर नंदुरबारला १,९४० मतदान केंद्रांवर मतदान घेण्यात आले. धुळ्यात भाजप-शिवसेना युतीचे उमेदवार केंद्रीय संरक्षण राज्यमंत्री डॉ. सुभाष भामरे आणि काँग्रेस-राष्ट्रवादीचे उमेदवार आमदार कुणाल पाटील यांच्यासह एकूण १८ उमेदवार रिंगणात आहेत. याठिकाणी अनिल गोटे यांनी अपक्ष उमेदवारी करीत आव्हान उभे केले आहे. तर नंदुरबार मतदारसंघात भाजप-शिवसेना युतीच्या उमेदवार खासदार डॉ. हीना गावित आणि काँग्रेस-राष्ट्रवादीचे उमेदवार अॅड. के. सी. पाडवी यांच्यात प्रमुख लढत आहे. याठिकाणी भाजपचे बंडखोर डॉ. सुहास नटावदकर यांनी अपक्ष उमेदवारी दाखल केल्याने मतांमध्ये विभागणी होण्याची चिन्हे आहेत. निवडणुकीच्या रिंगणातील सर्वच उमेदवारांनी आपल्या विजयाचा दावा करीत मतदारांचे आभार मानले आहेत. उन्हातही मतदारांनी दाखविलेल्या उत्साहाने लोकशाहीचा विजय झाल्याच्या प्रतिक्रिया मतदारांनी 'मटा'शी बोलताना दिल्या. सविस्तर वृत्त...२ ................................................. विधानसभानिहाय टक्केवारी (सायंकाळपर्यंत) धुळे मतदारसंघ धुळे शहर - ४५ धुळे ग्रामीण - ५८.२० शिंदखेडा - ५६.३७ मालेगाव मध्य - ४७.५० मालेगाव बाह्य- ५६.८२ बागलाण - ६३ नंदुरबार मतदारसंघ अक्कलकुवा - ७१ शहादा - ७० नंदुरबार - ६२.९२ नवापूर - ७२ साक्री - ६४ शिरपूर - ७०
धुळे, नंदुरबारला 'मतोत्सव'
म टा प्रतिनिधी, जळगावसतराव्या लोकसभा निवडणुकीसाठी पुण्यासारख्या शहराने फक्त ४९...
MT 30 Apr 2019, 4:00 am