नंदुरबारला अधिकारी, खेळाडूंचा सन्मान

नंदुरबारला अधिकारी, खेळाडूंचा सन्मान

पालकमंत्री अॅड. पाडवींच्या हस्ते ध्वजवंदन

म. टा. वृत्तसेवा, धुळे

भारतीय प्रजासत्ताक दिनानिमित्त रविवारी (दि. २६) नंदुरबार जिल्हा नवीन पोलिस कवायत मैदानावर आयोजित मुख्य ध्वजवंदन राज्याचे आदिवासी विकासमंत्री तथा‍ जिल्ह्याचे पालकमंत्री ॲड. के. सी. पाडवी यांनी केले. या वेळी पालकमंत्री ॲड. पाडवी यांच्या हस्ते विविध क्षेत्रांत उल्लेखनीय काम करणारे अधिकारी, कर्मचारी, खेळाडू, विद्यार्थी यांना सन्मानित करण्यात आले. यामध्ये सशस्त्र सेना ध्वजदिन निधी संकलनात उत्कृष्ट कार्य केल्याबद्दल जिल्हाधिकारी डॉ. राजेंद्र भारुड यांना स्मृतिचिन्ह प्रदान करण्यात आले. खडतर कामगिरीबद्दल विशेष सेवा पदक जिल्हा पोलिस अधीक्षक महेंद्र पंडित, पोलिस निरीक्षक संदीप रणदिवे, सहाय्यक पोलिस निरीक्षक गणेश न्हायदे व पोलिस उपनिरीक्षक भूषण बैसाणे यांना प्रदान करण्यात आले. हातोडा फेकीत सुवर्णपदक मिळविणारे भूषण चित्ते, ज्युदो क्लस्टरमध्ये कांस्यपदक विजेत्या निंबाबाई वाघमारे यांनाही विशेष सेवापदक प्रदान करण्यात आले. या वेळी जिल्हा परिषद अध्यक्षा ॲड. सीमा वळवी, खासदार डॉ. हिना गावीत, जिल्हा परिषदेचे उपाध्यक्ष ॲड. राम रघुवंशी, जिल्हाधिकारी डॉ. राजेंद्र भारुड, जिल्हा पोलिस अधीक्षक महेंद्र पंडित, जिल्हा परिषदेचे मुख्य कार्यकारी अधिकारी विनय गौडा, सहाय्यक जिल्हाधिकारी वसुमना पंत, अपर जिल्हाधिकारी दत्तात्रय बोरुडे, निवासी उपजिल्हाधिकारी धनंजय गोगटे, उपजिल्हाधिकारी धनंजय निकम, सुधीर खांदे आदी उपस्थित होते. या कार्यक्रमानंतर आयोजित सांस्कृतिक कार्यक्रमांद्वारे देशाच्या कला व संस्कृतीचे सुंदर दर्शन घडले. श्रीमती हि. गो. श्रॉफ हायस्कूल यांच्यामार्फत 'जागर संविधानाचा' हे पथनाट्य तर एस. ए. मिशन हायस्कूल, डॉ. काणे गर्ल्स हायस्कूल ॲग्लो उर्दू हायस्कूल यांनी देशभक्तिपर नृत्य सादर केले. के. आर. पब्लिक स्कूल यांनी एरियल सिल्क प्रात्यक्षिक सादर केले. शासकीय आश्रमशाळा भालेर यांनी देशभक्तिपर लेझीम नृत्य सादर केले. यानंतर पालकमंत्र्यांच्या हस्ते नागरिकांना भोजनासाठी 'शिवभोजन'चे टोकन व थाळीचे वितरण करण्यात आले. ही योजना ग्रामीण भागातून शहरात येणाऱ्या नागरिकांसाठी उपयुक्त ठरेल, असा विश्वासही ॲड. पाडवी यांनी या वेळी व्यक्त केला.