धुळे विधानपरिषदेसाठी
पटेल-पाटील सरळ लढत
म. टा. वृत्तसेवा, धुळे
धुळे व नंदुरबार विधानपरिषदेचा पोटनिवडणुकीत रिंगणात सात उमेदवारांपैकी सोमवारी (दि. १६) अर्ज माघारीच्या दिवशी पाच जणांनी उमेदवारी अर्ज मागे घेतले. त्यामुळे भाजपचे अमरिश पटेल व महाविकास आघाडीचे अभिजीत पाटील यांच्यात सरळ लढत होणार आहे. या निवडणुकीत उमेदवार निश्चित झाल्याने आता उमेदवारांच्या मोर्चेबांधणीला सुरुवात झाली आहे. अमरिश पटेल हे या वेळी भाजपचे उमेदवार असून, भाजपकडे धुळे जिल्ह्यात १३५, नंदुरबार जिल्ह्यात ७३ असे एकूण २०८ मतदारांचे संख्याबळ आहे. महाविकास आघाडीतील धुळे जिल्ह्यात शिवसेना ५, काँग्रेस ६२ राष्ट्रवादी काँग्रेस १७ असे एकूण १५४ मतदारांचे संख्याबळ आहे. धुळ्यात एमआयएमचे ४ आणि नंदुरबारमध्ये ५ मतदार असून, अन्य २२ असे या निवडणुकीत एकूण ४३८ मतदार आहेत. या निवडणुकीत पटेल यांच्यासोबत भाजपमध्ये गेलेल्या नगरसेवकही भाजपमध्ये गेले मात्र, मनातील खदखद आणि नाराजीमुळे ते 'मविआ'चे अभिजीत पाटील यांना मतदान करण्याची शक्यता नाकारता येत नाही.