मराठा सेवा संघाचे
शनिवारी अधिवेशन
धुळ्यात ८ व ९ फेब्रुवारी रोजी आयोजन
म. टा. वृत्तसेवा, धुळे
मराठा सेवा संघाचे प्रथमच राष्ट्रीय ग्रामीण महाअधिवेशन धुळे तालुक्यातील बोरकुंड गावात होणार असून, दि. ८ व ९ फेब्रुवारी रोजी दोन दिवशीय महाअधिवेशन कॉम्रेड शरद पाटील नगरी (मुक्तांगण शैक्षणिक संकुल, आदर्शगाव बोरकुंड) ही नियोजित जागा निश्चित करण्यात आली आहे. यानिमित्त सांस्कृतिक व प्रबोधनपर कार्यक्रमांची पर्वणी असणार आहे, अशी माहिती समितीचे अध्यक्ष चंद्रशेखर भदाणे यांनी दिली.
आतापर्यंत २४ राज्यस्तरीय अधिवेशन शहरी भागात झाले असून, प्रथमच ग्रामीण भागात हे अधिवेशन होत आहे. त्याचा मान धुळे तालुक्यातील बोरकुंड गावाला मिळाला आहे. या महाअधिवेशनाला महाराष्ट्रासह राज्याबाहेरील लोकांची उपस्थिती असणार आहे, अशी माहितीही समितीच्या पदाधिकाऱ्यांनी पत्रकार परिषदेत दिली. अधिवेशनाच्या पहिल्या दिवशी दि. ८ फेब्रुवारी रोजी शोभायात्रेचे आयोजन करण्यात आले आहे. या वेळी जिप. सदस्य आशुतोष पाटील हे उद्घाटक तर जिप. सदस्य देविदास सोनवणे, शिवसेना जिल्हाप्रमुख हिलाल माळी, डॉ. सुशील महाजन, जिप. सदस्य राम भदाणे, दीपक भदाणे यांच्या हस्ते बळीपूजन होईल.
दि. ९ फेब्रुवारी रोजी सकाळी ९ ते १२ या वेळेत उद्घाटन सत्र पार पडेल. नंतर कृषिमंत्री दादा भुसे हे उद्घाटक म्हणून असणार आहेत. अध्यक्षस्थानी मराठा सेवा संघाचे प्रदेशाध्यक्ष विजयकुमार घोगरे असतील. स्वागताध्यक्ष आमदार कुणाल पाटील, प्रमुख मार्गदर्शक पंढरपूरचे रामदास उर्फ शिवराज महाराज जाधव (कैकाडी) असतील. निमंत्रक बोरकुंडचे सरपंच बाळासाहेब भदाणे असतील तर आमदार अनिल भाईदास पाटील, डॉ. सुधीर तांबे यांच्यासह मान्यवरांची प्रमुख उपस्थिती असेल. अधिवेशनातील प्रथम सत्रात 'मराठा समाजाचे प्रश्न आणि पुढील कृती आराखडा' या विषयावर चंद्रशेखर शिखरे, प्रा. गंगाधर बनबरे (पुणे) हे मार्गदर्शन करतील. द्वितीय सत्रात 'महिलांचे शिक्षण व प्रबोधन' या विषयावर ज्येष्ठ पत्रकार श्रीमंत माने, डॉ. दीपाली माने व शिल्पा देशमुख हे मार्गदर्शन करणार आहेत. समारोप्रसंगी मराठा सेवा संघाचे संस्थापक अध्यक्ष अॅड. पुरूषोत्तम खेडेकर, एस. आर. पाटील (संस्थापक सहसचिव मराठा सेवा संघ) उपस्थित राहणार आहे. मराठा समाज बांधवांनी महाअधिवेशनाला मोठ्या संख्येने उपस्थित राहण्याचे आवाहनही या वेळी करण्यात आले.