विवाहितेचा संशयास्पद मृत्यू

अडीच महिन्यानंतर महाडला सासरच्यांविरुद्ध गुन्हा

म. टा. वृत्तसेवा, धुळे

तालुक्यातील सरवड येथे माहेर असलेल्या विवाहिता शीतल पाटील हिचा रायगड जिल्ह्यातील महाडला संशयास्पदरित्या मृत्यू झाला. विवाहितेचा पती विनीत पाटील व इतरांनी तिचा घातपात केल्याचा संशय शीतलच्या नातलगांनी व्यक्त केला आहे. त्यांच्या तक्रारीवरून मंगळवारी मध्यरात्री महाड शहर पोलिस ठाण्यात पाच जणांविरुद्ध गुन्हा दाखल करण्यात आला आहे.

सरवड येथील शीतल भीमराव पाटील या उच्चशिक्षित तरुणीचा विवाह विनीत ज्ञानेश्वर पाटील यांच्याशी ६ डिसेंबर २०१५ रोजी झाला होता. परंतु, लग्नानंतर काही दिवसांतच पती विनीत पाटील, सासरे ज्ञानेश्वर दामू पाटील, सासू निर्मला ज्ञानेश्वर पाटील, नणंद वृषाली अशोंक मुंगसे, अलका संभाजी पाटील यांच्याकडून छळ सुरू झाला. तिच्याशी संभाषण केले जात नसे तसेच तिला उपाशी ठेवण्यात येऊ लागले. तिच्या आरोग्याकडे दुर्लक्ष करून माहेरी पाठविण्यात देण्यात येत होते. ती एम. ए. बी. एड. असल्यामुळे तिच्याकडे नोकरीचा आग्रह धरला जात होता. दरम्यानच्या काळात विनीतला रायगड जिल्ह्यातील महाड या ठिकाणी औषधी निर्माण कंपनीत नोकरी लागली. त्यामुळे सुमारे एक वर्ष नऊ महिने सासरी सिन्नर येथे राहिल्यानंतर शीतल महाड येथे आली. महाड येथे असताना दि. १ मार्च २०१८ रोजी हिचा संशयास्पदरित्या मृत्यू झाला. शीतलचा भाऊ रोशन भीमराव पाटील (जळगाव) यांच्या तक्रारीवरून महाड शहर पोलिस ठाण्यात गुन्हा दाखल करण्यात आला आहे.