तांत्रिक अधिकारी एसीबीच्या जाळ्यात

पाच हजाराची लाच घेताना अटक

म. टा. वृत्तसेवा, धुळे

धुळे जिल्ह्यात रोजगार हमी या योजनेंतर्गत ज्या शेतकऱ्यांना सिंचन विहिरी मंजूर झाल्या आहेत. त्यांची पिळवणूक पंचायत समितीमधील अधिकारी व कर्मचाऱ्यांकडून होत असल्याचे गुरूवारी (दि. १४) समोर आले. शिंदखेडा येथील सिंचन विहिरीचे अनुदान काढून देण्यासाठी एका शेतकऱ्याकडून ५ हजारांची लाच घेताना तांत्रिक अधिकाऱ्याला रंगेहात पकडल्याने धुळे जिल्ह्यात खळबळ उडाली आहे.

मंत्री जयकुमार रावल यांच्याकडे रोजगार हमी मंत्रालयाचा कारभार आल्यानंतर त्यांनी धुळे जिल्ह्यात तसेच शिंदखेडा तालुक्यात मोठ्या प्रमाणावर विहिरी मंजूर करून आणल्या. या योजनेतंर्गत प्रत्येक शेतकऱ्याला ३ लाख रुपयांचे अनुदान सिंचन विहिरींसाठी दिले जाते.

असे आहे प्रकरण

शिंदखेडा तालुक्यातील कलमाडी गावातील एका शेतकऱ्याला सिंचन विहीर मंजूर झाली होती. शेत गट नं १२७/२ क क्षेत्र ०.७७ आर या शेत गटावर संबंधित तक्रारदार शेतकरी यांना महात्मा गांधी रोजगार हमी जलसिंचन योजनेमध्ये सिंचन विहिरीचे काम सुरू करण्यासाठी वर्क ऑर्डर मिळाली होती. त्यानुसार तक्रारदार यांनी सिंचन विहिरीचे काम गावातील मंजूर करून काम सुरू केले होते. या विहिरीचे काम पूर्ण झाल्याने तक्रारदार हे पंचायत समिती शिंदखेडा येथील तांत्रिक अधिकारी नरेश बोरसे यांना भेटले असता त्यांनी विहिरीचे उर्वरित अनुदान ९२६१६ रुपये रकमेच्या बिलाची मोजमाप पुस्तिकेवर नोंद करून वरिष्ठांकडे पाठविण्यासाठी पाच हजार रुपयांची लाच मागितली. याप्रकरणी तांत्रिक अधिकारी नरेश बोरसे यांना लाच घेताना गुरूवारी पंचायत समिती शिंदखेडाच्या आवारात लाचलुचपत प्रतिबंधक विभागाच्या पथकाने रंगेहात पकडून अटक केली. बोरसेंविरुद्ध शिंदखेडा पोलिस ठाण्यात गुन्हा दाखल करण्यात आला आहे.रोजगार हमी योजनेमध्ये शेतकऱ्यांची होणारी पिळवणूक थांबेल का? शेतकऱ्यांना लवकर अनुदान दिले जात नाही. त्यामुळे मंत्र्यांनी याकडे लक्ष देणे गरजेचे आहे.