धुळे मनपाच्या आवारात हाणामारी

वॉर्डातील समस्या मांडणाऱ्यास मारहाण

म. टा. वृत्तसेवा, धुळे

धुळे महापालिकेत आपल्या वॉर्डातील नळ गळतीची तक्रार करणाऱ्या एका तरुणाला गुरुवारी (दि. ८) काँग्रेसचे नगरसेवक इस्माइल पठाण यांच्या मुलांनी आणि कार्यकर्त्यांनी मारहाण केली. पोलिसांकडून वेळीच परिस्थिती नियंत्रणात आणून नगरसेवक पुत्रांना ताब्यात घेतल आहे.

धुळे महापालिकेच्या आवारात गुरुवारी (दि. ८) ही हाणामारी झाल्याने परिसरात काहीकाळ तणाव निर्माण झाला होता. शहरातील देवपूरातील प्रभाग क्रमांक ९ मधील काँग्रेसचे नगरसेवक इस्माइल पठाण यांच्या भागातील रहिवासी तौसिफ खाटीक या तरुणाने आपल्या घराजवळील एका नादुरुस्त नळाच्या आणि पाणी गळतीचा व्हिडीओ सोशल मीडियावरून इतर नागरिकांपर्यत पसरविला. तसेच गुरुवारी (दि. ८) तो व्हिडीओ नगरसेवक इस्माइल पठाण यांच्या मोबाइलवर टाकण्यात आला. याबाबत तक्रारदार तौसिफ खाटीक यांनी पाणी गळतीवरून संताप व्यक्त करून पठाणांसोबत वाद घातला. त्याचवेळी पठाण यांच्या मुलांना हा प्रकार समजताच त्यांनी तौसिफ खाटीक यांना मारहाण करण्यात सुरुवात केली. यावेळी तत्काळ इतरांनी मध्यस्थी करीत वाद मिटविला मात्र त्याचवेळी शहर पोलिस ठाण्यातील अधिकारी व कर्मचारी दाखल होऊन त्यांनी तक्रारदार तौसिफ खाटीक व नगरसेवक इस्माइल पठाण यांच्या तीनही मुलांना ताब्यात घेतले. याप्रकरणी पोलिसांनी वाद घालणाऱ्यांना तंबी देऊन सोडून दिले.

कोट००
माझ्या प्रभागातील नागरिकांच्या सुविधांबाबत मी सदैव तत्पर असतो, मात्र नागरिकांनी तक्रारी थेट मला सांगायला हव्या. परंतु, त्यांनी सोशल मीडियावर समस्या मांडणे योग्य नाही, ती प्रत्यक्ष सांगितली तर मी लगेच समस्या मार्गी लावेल.
-इस्माइल पठाण, नगरसेवक