म. टा. वृत्तसेवा, चाळीसगाव
शहरातील खासगी डॉक्टर नाशिकला पॉझिटिव्ह आढळून आला आहे. शहरातील जहागीरदारवाडी भागात या डॉक्टरचा दवाखाना असून, त्यांच्या संपर्कातील चार जणांना क्वारंटाइन करणार असल्याची माहिती तालुका आरोग्य अधिकारी देवराम लांडे यांनी दिली.
मूळचा कन्नड तालुक्यातील ५५ वर्षीय असलेल्या या डॉक्टरचा जहागीरदारवाडी भागात दवाखाना आहे. तीन ते चार दिवसांपूर्वी ते येथील दवाखाना बंद करून नाशिकला गेले होते. तेथे गेल्यावर त्यांचर प्रकृती बिघडल्याने त्यांनी तपासणी करण्यात आली. त्यात ते गुरुवारी करोना पॉझिटिव्ह आढळून आले. तालुका प्रशासनाने याची माहिती मिळताच प्रांताधिकारी लक्ष्मीकांत साताळकर, तहसीलदार अमोल मोरे, तालुका आरोग्य अधिकारी डॉ. देवराम लांडे यांनी जहागीरदारवाडी परिसरात धाव घेऊन पाहणी केली. तसेच त्यांच्या संपर्कात आलेल्या चार जणांना क्वारंटाइन करून त्यांचे स्वॅब तपासणीसाठी पाठविण्यात येणार असल्याचे माहिती डॉ. लांडे यांनी दिली. पालिकेच्या कर्मचाऱ्यांनीही परिसरात जंतूनाशकाची फवारणी करून परिसर सॅनिटाइझ केला. संबंधित डॉक्टर काही दिवसांपूर्वी कन्नड तालुक्यातील आपल्या मूळगावी गेला होता. तेथे त्यांना करोनाची लागण झाली असावी असा अंदाज आहे.