छत कोसळल्याने दोन मुलींचा मृत्यू

शिंदखेडा तालुक्यातील घटना; दोन जखमी

म. टा. वृत्तसेवा, धुळे

जिल्ह्यातील शिंदखेडा तालुक्यातील आरावे गावात गुरुवारी पहाटेच्या सुमारास घराचे छत कोसळून ढिगाऱ्याखाली दाबल्याने दोन मुलींचा दुर्दैवी मृत्यू झाला. तर पती-पत्नी जखमी झाले आहेत. घर कोसळल्याच्या आवाजाने गुरुवारी पहाटे परिसरातील ग्रामस्थ घटनास्थळी मदतीसाठी धावल्याने दोन जणांचा जीव वाचला.

शिंदखेडा तालुक्यातील शेवाळे येथे राहणारे भटू भालचंद्र देशमुख (वाणी) हे शेतमजूर असून, परिवाराच्या उदरनिर्वाहासाठी गेल्या दहा ते बारा वर्षांपासून स्थलातंरित झाले होते. गावात त्यांनी चार गाळ्यांचे लाकडी घर भाड्याने घेतले होते. त्यांच्यासोबत पत्नी, मुलगी व पुतणी वास्तव्याला होते. गुरुवारी (दि. १८) दिवसभरातील शेतीकाम आटपून हा परिवार झोपला होता. त्यावेळी मध्यरात्रीच्या सुमारास अचानक घराचे छत कोसळून त्याखाली भटू देखमुख यांची मुलगी रुपाली भटू देशमुख (वाणी) (वय १०) आणि पुतणी धनश्री सुपडू देशमुख (वाणी) (वय १४) या दोन्ही मातीच्या ढिगाऱ्याखाली दाबल्या गेल्या. तर भटू देशमुख व पत्नी निर्मलाबाई देशमुख हे दोन्ही गंभीर जखमी झाले. दरम्यान, घराचे छत कोसळल्याने मोठा आवाज झाला. त्यानंतर परिसरातील ग्रामस्थ घटनास्थळी धावले. त्यांनी ढिगाऱ्याखाली दाबले गेलेल्या देखमुख कुटुंबाला बाहेर काढण्याचा प्रयत्न केला. मात्र, घराचे छत कोसळून दोन्ही मुलींच्या अंगावर पडल्याने त्यांचा जागीच मृत्यू झाला. भटू देशमुख व निर्मलाबाई देशमुख यांना वाचविण्यात ग्रामस्थांना यश आले. दोघांना शिंदखेडा ग्रामीण रुग्णालयात उपचारासाठी दाखल करण्यात आले. या प्रकरणी शिंदखेडा पोलिस ठाण्यात आकस्मिक मृत्यूची नोंद झाली आहे.