चाळीसगाव तालुक्यातील पिलखोड येथील घटना
म. टा. वृत्तसेवा, चाळीसगाव
भांडण सोडवण्यास गेलेल्या काकाचा पुतण्याने भरदिवसा चाकू खुपसून खून केल्याची खळबळजनक घटना तालुक्यातील पिलखोड येथे गुरुवारी (दि. २१) दुपारी १ वाजेच्या सुमारास घडली. या हल्ल्यात मुलगाही गंभीर जखमी झाला असून, पोलिसांनी खूनप्रकरणी दोघा सख्या भावांना ताब्यात घेतले आहे. धोंडू सुपडू पाटील (वय ५५) असे मृत काकाचे नाव असून, त्यांचा मुलगा महेश धोंडू पाटील (वय २८) हा गंभीर जखमी झाला आहे.
मृत धोंडू पाटील व त्याचे धाकटे भाऊ बंडू सुपडू पाटील हे दोघे पिलखोड येथे शेजारी-शेजारी राहतात. गुरुवारी दुपारी बंडू पाटील यांचे दोघ मुलं संशयित आरोपी निखील बंडू पाटील (वय २८) व गौरव बंडू पाटील (वय २२) यांच्यात त्यांच्या घरात वाद झाले. हा वाद सुरू असताना निखीलचा चुलत भाऊ महेश व काका धोंडू पाटील हे वाद सोडवण्यासाठी गेले. त्यावेळी निखील व गौरव यांनी त्यांच्याशी वाद घातला. त्यावेळी महेश याचे वडील धोंडू पाटील हे आले. ते बोलत असताना रागाच्या भरात गौरव याने घरातील चाकू धोंडू पाटील यांच्या पोटात खुपसला. त्यावेळी महेश हादेखील आपल्या वडिलांना वाचविण्यासाठी धावला असता त्याच्यावरही हल्ला करून चाकूने वार केले. चाकूचा वार झाल्याने दोघे बाप-लेक जमिनीवर कोसळले. त्यानंतर त्यांना नातेवाईक तत्काळ उपचारासाठी चाळीसगाव येथे आणत असताना रस्त्यातच धोंडू पाटील यांचा मृत्यू झाला, तर गंभीर जखमी झालेल्या महेश यास चाळीसगाव येथील खासगी रुग्णालयात उपचारार्थ दाखल करण्यात आले आहे. मृत धोंडू पाटील यांच्या पश्चात पत्नी, दोन मुले असा परिवार आहे. याप्रकरणी मेहूणबारे पोलिस ठाण्यात निखील व गौरव पाटील या दोघांविरोधात खुनाचा गुन्हा नोंदविण्यात आला आहे.
घटनेची माहिती मिळताच मेहूणबारे पोलिस ठाण्याचे सहाय्यक पोलिस निरीक्षक सचिन बेंद्रे, हवालदार कमलेश राजपूत, सिद्धांत शिसोदे, मिलिंद शिदे यांनी घटनास्थळी धाव घेऊन घटनेचा पंचनामा केला. पोलिसांनी दोघा संशयित सख्या भावांना ताब्यात घेतले आहे. घटनेची माहिती मिळताच उपविभागीय पोलिस अधिकारी कैलास गावडे यांनी मेहूणबारे पोलिस ठाण्यात भेट देऊन घटनेची माहिती घेतली.