मुंबईत महिलेने जीवन संपवलं, धुळ्यातील वकील वादात; मित्राची जमीन बळकावल्याच्या आरोपावर म्हणाला..

धुळे : मंत्रालयामध्ये विष प्राशन करून आत्महत्या करणाऱ्या शीतल गादेकर या महिलेच्या मृत्यूनंतर मोठी खळबळ उडाली आहे. धुळे एमआयडीसीमध्ये असलेली पी १६ या क्रमांकाची जागा बनावट कागदपत्रांच्या आधारे हस्तांतरित केल्याचा आरोप शीतल गादेकर यांनी केला होता. या संदर्भात त्यांनी ॲड. नरेश मुणोत यांनी एमआयडीसीमधील अधिकाऱ्यांच्या संगनमताने खोट्या कागदपत्रांच्या आधारे ही जागा हडप केल्याचा आरोप केला होता. शीतल गादेकर यांच्या मृत्यूनंतर ॲड. नरेश मुणोत यांनी प्रतिक्रिया देत आपली बाजू मांडली आहे.

शीतल गादेकर यांचे पती रवींद्र गादेकर हे माझे चांगले मित्र होते. २०१० साली त्यांना पैशांची गरज असल्याने त्यांनी मला त्यांच्या जागेचा प्रस्ताव ठेवला होता. त्यानंतर सर्व कायदेशीर प्रक्रिया पूर्ण करून ही जागा आपल्याकडे हस्तांतरित करण्यात आली असून याबाबतचे आपल्याकडे सगळे पुरावे असल्याचे ॲड. नरेश मुणोत यांनी सांगितलं आहे.

२०१९ साली शीतल गादेकर यांचे पती रवींद्र गादेकर यांचे निधन झाल्यानंतर शीतल यांनी याबाबत तक्रार दाखल करण्यास सुरुवात केली असून माझ्यावर खोटे आरोप करण्यात आले आहेत. शीतल गादेकर यांनी वेळोवेळी माझ्याकडे खंडणी देखील मागितल्याचा आरोप ॲड. नरेश मुणोत यांनी केला. गादेकर यांच्या मृत्यूनंतर त्यांच्या कुटुंबातील एका सदस्याने आज सकाळी ही जागा आम्हाला पुन्हा हस्तांतरित करा, अन्यथा तुम्हाला जीवे ठार मारू, अशी धमकी दिल्याचा खळबळजनक दावा नरेश मुणोत यांनी केला आहे.

राज्य कोरोनाशी झुंजत होतो तेव्हा सावंत बंडाचं प्लॅनिंग करत होते, व्वा रे आरोग्यमंत्री... राष्ट्रवादी खवळली

दरम्यान, ॲड. नरेश मुणोत यांनी याबाबत दुपारी धुळे शहर पोलीस ठाण्यात तक्रार देखील दाखल केली असून आपल्याला न्याय मिळावा अशी मागणी मुणोत यांनी केली आहे

मुंबईत काय घडलं?

शीतल गादेकर यांनी काल मंत्रालयासमोर विष प्राशन करण्याचा प्रयत्न केला. पोलिसांनी त्यांना तत्काळ थांबवलं होतं. मात्र, काही प्रमाणात त्यांनी विषारी द्रव्य प्राशन केलं. त्यामुळे त्यांना जेजे रुग्णालयात दाखल करण्यात आले. मात्र उपचार सुरू असताना गादेकर यांची प्राणज्योत आज मालवली आहे. पतीच्या निधनानंतर नरेश मुणोत या मित्राने त्यांची जमीन बळकावली, याबाबत कारवाई करावी, अशी त्यांची मागणी होती. शीतल गादेकर या एका कथित समाजसेवकाच्या संपर्कात होत्या. त्याच्या सल्ल्यावरूनच गादेकर यांनी विष प्राशन केल्याचं बोललं जात आहे.