कृषी विद्यापीठासाठी विद्यार्थ्यांचा सायकल मोर्चा

म. टा. वृत्तसेवा, धुळे

शहरात उत्तर महाराष्ट्र विद्यापीठाच्या उपकेंद्रास जागा न देणे, कृषी विद्यापीठ स्थापनेस टाळाटाळ करणे, धुळ्यातील शासकीय तंत्रनिकेतन कॉलेज बंद करण्याचा निर्णय याविरुद्ध युवा सेनेने गुरुवारी (दि. १६) जिल्हाधिकारी कार्यालयावर विद्यार्थ्यांकडून सायकल मोर्चा काढण्यात आला.

भाजप सरकारचे निर्णय जिल्ह्यातील विद्यार्थ्यांवर अन्याय करणारे असून याविरुद्ध भूमिकेतून युवा सेनेने जिल्हाधिकारी कार्यालयावर मोर्चा काढला. देवपूरातील महाजन हायस्कूलपासून दुपारी बारा वाजता युवासेना जिल्हाध्यक्ष पंकज गोरे यांच्या नेतृत्वाखाली सायकल मोर्चास आग्रारोडने सुरुवात झाली. यावेळी शेकडो विद्यार्थ्यांनी मोर्चात सहभाग नोंदविला होता.

जिल्हाधिकारी कार्यालयावर मोर्चा आल्यानंतर निवासी जिल्हाधिकारी हुलवळे यांना मोर्चेकरांनी निवेदन दिले. शासकीय तंत्रनिकेतन बंद न करण्याचे तोंडी आश्वासन देऊ नका तर लेखी पत्र प्राचार्याना देण्यात यावे, तसेच कृषी विद्यापीठ धुळे जिल्ह्याचा हक्क नाही तर अधिकार आहे. त्यासाठी लागणाऱ्या सोयीसुविधा, जमीन, प्राध्यापक वर्ग, कर्मचारी आदी सर्व उपलब्ध आहेत. तरीदेखील कृषी विद्यापीठ धुळे जिल्ह्यात स्थापन होण्यासाठी अनेकांचा विरोध का होत आहे, अशा सवालह‌ी यावेळी विचारण्यात आला. आंदोलनात ऐश्वर्या अग्रवाल, संदीप मुळीक, हरीष माळी, मनोहर जाधव, आकाश शिंदेसह विद्यार्थी सहभागी झाले होते.