खंडणी आणि खुन्यातील आरोपी फरार; शौचालयाला नेत असताना...

गोंदियाः पोलीस ठाण्यातून तेही पोलिस कर्मचाऱ्यांच्या समोर आरोपी भिंत चढून पळाल्याची धक्कादायक घटना समोर आली आहे. पळणारा आरोपी हा छोटा मोठा गुन्हेगार नसून दहा लाखाच्या खंडणीसाठी १७ वर्षीय मुलाचे अपहरण आणि खून प्रकरणातला आरोपी आहे. घटना गोंदिया जिल्ह्यातील आमगाव पोलीस स्टेशनची असून येथील पोलिस गुन्हेगारांकरिता किती गंभीर आहे हे दिसून येते. दुर्गाप्रसाद सुखचंद हरिणखेडे (वय २४ रा. नवेगाव खैरलांजी,मध्यप्रदेश) असे पसार झालेल्या आरोपीचे नाव आहे असून आज सकाळी ८ वाजेच्या सुमारास पोलीस स्टेशन आवारातच असलेल्या शौचालयात शौचास गेला असता सोबत असलेल्या एकट्या पोलिसाला झटका देत भिंत चढून फरार झाला आहे.

सदर आरोपीने चेतन खोब्रागडे ह्या १७ वर्षीय मुलाच्या १० लाखांच्या खंडणीसाठी अपहरण, खंडणी आणि खुनाच्या गुन्ह्यासाठी अटक झाली होती. त्याला न्यायालयात हजर केले असता ७ दिवसाची पोलिस कोठडी मिळाली होती. मात्र आज पोलिस कोठडीत असलेला आरोपी पसार झाला आहे. आरोपी पसार झाल्याची घटना माहीती होताच मृतकाच्या कुटुंबातील नागरिकांसह परिसरातील नागरिकांनी आमगाव पोलीस ठाण्याकडे धाव घेतली असून पोलीस ठाण्यासमोर मोठी गर्दी गोळा झालेली आहे. विशेष म्हणजे यापुर्वी याच पोलीस ठाण्यात एका आरोपीचा मारहाणी दरम्यान पोलीस कोठडीतच मृत्यू झाल्याचे प्रकरण घडले होते. त्यावेळी सुध्दा पोलीस अधिकारी व कर्मचारी निलंबित झालेले होते. आता पोलीस कोठडीतून आरोपी फरार झाल्याने नव्या वादाला तोंड फुटले असून आमगाव पोलिसांच्या कर्तव्य दक्षते वर प्रश्नचिन्ह लागली आहेत.

वाचाः बीड हादरले! जिल्हाधिकारी कार्यालयासमोर अज्ञात व्यक्तीकडून गोळीबार

आता पोलिसांनी वेगवेगळी टीम तयार करत आरोपीचा शोध सुरू केला आहे. विशेष म्हणजे आमगाव पोलीस ठाणे आणि उपविभागीय पोलीस अधिकारी यांचे कार्यालय एकमेकाला लागूनच असताना असा प्रकार घडलाच कसा प्रश्न उभा ठाकला आहे.

वाचाः अत्याचार प्रकरणात मेहबूब शेख यांची पुन्हा चौकशी सुरू; मेडिकल करत जबाबही नोंदवला