हळदीची काढणी सुरू असताना भयंकर घटना; वीज कोसळून २५ वर्षीय तरुणाचा शेतातच मृत्यू

हिंगोली : मराठवाड्यासह राज्याच्या इतरही भागात वादळी वाऱ्यासह अवकाळी पाऊस पडेल, असा अंदाज हवामान खात्याने वर्तवला आहे. हवामान विभागाने वर्तवलेल्या अंदाजानुसार हिंगोली जिल्ह्यातील वातावरणात कमालीचा बदल झाला असून आज सकाळपासून जिल्ह्याच्या विविध भागात विजांच्या कडकडाटासह पावसाने जोरदार हजेरी लावली. अचानक सुरू झालेल्या पावसाने हळद उत्पादक शेतकऱ्यांची चांगलीच तारांबळ उडाली. तसंच औंढा नागनाथ तालुक्यात एक दुर्घटना घडली आहे. बोरजा येथे हळद काढत असताना वीज कोसळून पीराजी विठ्ठल चव्हाण (वय २५) या शेतकऱ्याचा जागीच मृत्यू झाला.

शेतात हळद काढणीचे काम सुरू असताना अचानक पावसाने हजेरी लावली. दुपारी वादळवाऱ्यासह विजांच्या कडकडाटात पाऊस सुरू झाल्याने शेतकऱ्यांची तारांबळ उडाली. मागील महिन्यात देखील अवकाळीचा फटका पिकांना बसला होता. आज नर्सी नामदेव, कडोळी, जवळा पांचाळ, केंद्रा बु येथे पाऊस झाला. यावेळी हळद उत्पादक शेतकऱ्यांची धावपळ उडाली. तसेच कळमनुरी, कुरुंदा येथे रिमझिम पाऊस झाला.

खेड-आंबवली मार्गावर बाईकला भीषण अपघात; ४० वर्षीय व्यक्तीचा जागीच मृत्यू, दोन लेकरं झाली पोरकी

औंढा नागनाथ तालुक्यातील बोरजा येथे शेतामध्ये हळद काढणी सुरू होती. यावेळी अचानक पाऊस सुरू झाला. वीज कोसळून पीराजी विठ्ठल चव्हाण या तरुण शेतकऱ्याचा जागीच मृत्यू झाला. घरातील कर्ता व्यक्ती गेल्याने चव्हाण यांच्या कुटुंबावर दुःखाचा डोंगर कोसळला आहे.

दरम्यान, जिल्ह्यात आज सकाळपासून सूर्यदर्शन झाले नसून आणखी पाऊस कोसळण्याचा अंदाज आहे. प्रशासनाने वादळी वाऱ्याच्या तडाख्यापासून वाचण्यासाठी दिलेल्या सूचनांचे पालन करण्याची गरज हिंगोलीतील या दुर्घटनेनं अधोरेखित झाली आहे.