खंडणीसाठी अश्लिल व्हिडीओ व्हायरल करण्याची धमकी, पोलिसांकडून भामट्यांना बेड्या

हिंगोली : शहरातील एका तरुणाचे महिलेसोबत काढलेले अश्लिल व्हिडीओ व्हायरल करण्याची धमकी देऊन खंडणी उकळणाऱ्या वाशिमच्या दोघांना बासंबा पोलिसांनी आज दुपारी बेड्या ठोकल्या. त्यांच्यावर हिंगोली ग्रामीण पोलिस ठाण्यात गुन्हा दाखल करण्याची प्रक्रिया सुरु होती. राहुल सुरेश कांबळे व आकाश उर्फ गणेश त्र्यंबक जिरवणकर (दोघे रा. वाशीम) असे या दोघांची नांवे असल्याचे पोलिसांनी सांगितले.

पोलिसांनी दिलेल्या माहितीनुसार शहरालगत एका पेट्रोल पंपावर काम करणाऱ्या संतोष आचम याची वाशीम येथील वरील दोन तरुणांसोबत ओळख झाली. या दोघांनी संतोष यास ता. १० नोव्हेंबर २१ रोजी वाशीम येथे बोलावले. त्या ठिकाणी त्यास चहामध्ये गुंगीचे औषध देऊन त्याचे एका महिलेसोबत अश्लिल व्हिडीओ काढले. गुंगीची मात्रा उतरल्यानंतर संतोष परत हिंगोली येथे आले.

मात्र काही दिवसानंतर राहुल कांबळे व आकाश उर्फ गणेश याने संतोष यास व्हिडीओ दाखवून ते व्हिडीओ व्हायरल करण्याची धमकी दिली. यावेळी बदनामीच्या भीतीने घाबरलेल्या संतोषने व्हिडीओ व्हायरल न करण्यासाठी पैसेही दिले. मात्र राहुल व आकाश यांनी त्यास वेळोवेळी पैशाची मागणी करुन त्रस्त केले. त्यांची पैशाची मागणी पूर्ण करण्यासाठी संतोष याने राहते घर देखील विकले. आता पर्यंत दोघांनी संतोष कडून ११.६१ लाख रुपये उकळल्याचे पोलिसांनी सांगितले.

दरम्यान, आज पुन्हा १० हजार रुपये देण्याची मागणी केली. मात्र आपल्याकडे तीन हजार रुपयेच असल्याचे संतोषने सांगितले. सदर रक्कम माळहिवरा शिवारात आणून देण्याचे त्यांनी सांगितले. यावेळी संतोषने या प्रकाराची माहिती पोलिसांना दिली.

पोलिस अधिक्षक राकेश कलासागर, सहाय्यक पोलिस अधीक्षक यतीश देशमुख यांच्या मार्गदर्शनाखाली बासंबा पोलिस ठाण्याचे उपनिरीक्षक सुरेश भोसले, सहाय्यक पोलिस उपनिरीक्षक मगन पवार, जमादार कऱ्हाळे, काकडे यांनी माळहिवरा शिवारात सापळा रचून सदर रक्कम घेतांना दोघांनाही पकडले.

त्यांच्याकडून एक खंजर व तीन हजार रुपयांची रक्कम पोलिसांनी जप्त केली असून त्यांना हिंगोली ग्रामीण पोलिसांच्या हवाली करण्यात आले आहे. त्यांच्यावर खंडणीचा गुन्हा दाखल करण्याची प्रक्रिया सुरु असल्याचे पोलिसांनी सांगितले. सोबतच अनोळखी नंबर वरून काही मेसेज येत असल्यास, किंवा महिलेची व्हॉट्सअॅपवर डीपी ठेवून तुमची फसवणूक केली जाऊ शकते त्यामुळे सावधानता बाळगण्याचे आवाहन पोलिसांनी केले आहे.