आपण दोघे लग्न करणार आहोत! अल्पवयीन तरुणीला प्रेमाच्या जाळ्यात ओढलं; ती गर्भवती राहताच...

हिंगोली: राज्यात महिलांवरील अत्याचारांच्या घटनांमध्ये वाढ झाल्याचे आकडेवारीतून दिसून येते. जवळचे नातेवाईक, मित्र परिवार यांच्याकडून होत असलेल्या अत्याचारांचे प्रमाण सर्वाधिक आहे. अशीच एक घटना वसमत तालुक्यातील मोहगाव येथे घडली आहे. एका अल्पवयीन मुलीस लग्नाचे आमिष दाखवून तिच्यावर अत्याचार केल्याची धक्कादायक घटना उघडकीस आली आहे. मुलगी गर्भवती राहिल्यानंतर तरुणाने लग्नास नकार दिला. या तरुणाविरुद्ध वसमत ग्रामीण पोलीस ठाण्यात मंगळवारी (दि.१६) पहाटे गुन्हा दाखल झाला आहे.

पोलिसांनी दिलेल्या माहितीनुसार वसमत तालुक्यातील मोहगाव येथील एका अल्पवयीन मुलीस गावातील धोंडिबा सोपान श्रीरामे (वय २५) या तरुणाने प्रेमाच्या जाळ्यात ओढले. तू माझी होणारी पत्नी आहेस. आपण दोघे लग्न करणार आहोत, असे आमिष दाखवून धोंडिबा यांने मागील दोन वर्षापासून मुलीवर अत्याचार केले. त्यामुळे मुलगी गर्भवती राहिली.
पैसे हातात ठेवा, डबल करतो! साधू बनून चमत्कार करायला गेले, त्यांच्यासोबत भलताच प्रकार घडला
मुलीने घडलेला सर्व प्रकार तिच्या कुटुंबियांना सांगितला. त्यानंतर तिच्या कुटुंबीयांनी मंगळवारी पहाटे वसमत ग्रामीण पोलीस ठाणे गाठून रितसर तक्रार दाखल केली. यावरून पोलिसांनी धोंडिबा श्रीरामे याच्या विरुद्ध बाल लैंगिक अत्याचार प्रतिबंधक कायद्यांतर्गत गुन्हा दाखल केला आहे. घटनेचे गांभीर्य लक्षात घेऊन पोलिसांनी धोंडिबा यास पहाटेच ताब्यात घेतले. पोलीस अधीक्षक राकेश कलासागर यांच्या मार्गदर्शनाखाली सहाय्यक पोलीस अधिक्षक यतिश देशमुख, सहाय्यक पोलीस निरीक्षक विलास चवळी उपनिरीक्षक एम. डी.यामावार यांनी घटनास्थळी भेट देऊन पाहणी केली.