जिवे मारण्याची धमकी देत अल्पवयीन मुलीवर दोघांकडून अत्याचार, पोलिसांनी अशा आवळल्या मुसक्या

हिंगोली : हिंगोलीतील औंढा नागनाथ तालुक्यातील तपोवन येथे एका अल्पवयीन मुलीवर महिन्यापूर्वी अत्याचार करणाऱ्या दोघांवर आज हट्टा पोलीस ठाण्यात गुन्हा दाखल करण्यात आला आहे. गजानन बाळासाहेब कदम (वय २३) व मुंजाजी रमेश कदम (वय २४) अशी आरोपींची नावे असून पोलिसांनी दोघांनाही अटक केली आहे.

पोलिसांनी दिलेल्या माहितीनुसार, औंढा तालुक्यातील तपोवन येथील एक अल्पवयीन मुलगी सुमारे एक महिन्यापूर्वी दुपारच्या सुमारास घरी एकटी असताना आरोपी गजानन व मुंजाजी यांनी तिच्या घरात प्रवेश केला. त्यानंतर दोघांनी त्या मुलीस जीवे मारण्याची धमकी देऊन तिच्यावर अत्याचार केला. हा प्रकार कोणाला सांगितल्यास जिवे मारण्याची धमकी दिली. या प्रकारामुळे घाबरलेल्या त्या मुलीने ही बाब कोणालाही सांगितली नाही.

मात्र, मागील काही दिवसांपासून आरोपी पुन्हा मुलीला त्रास देऊ लागले होते. त्यामुळे मुलीने एक महिन्यापूर्वी झालेली घटना तिच्या आई-वडिलांना सांगितली. या प्रकारामुळे संतप्त झालेल्या मुलीच्या आई - वडिलांनी बुधवारी रात्रीच मुलीसह हट्टा पोलीस ठाणे गाठले. त्यानंतर मुलीवर झालेल्या अत्याचाराची रीतसर तक्रार दिली . यावरून पोलिसांनी गजानन कदम व मुंजाजी कदम यांच्याविरुद्ध बाल लैंगिक अत्याचार प्रतिबंधक कायद्याअंतर्गत गुन्हा दाखल केला

दरम्यान या घटनेचे गांभीर्य लक्षात घेऊन पोलीस अधीक्षक राकेश कलासागर, सहाय्यक पोलिस अधिक्षक यतिश देशमुख, उपाधिक्षक किशोर कांबळे यांच्या मार्गदर्शनाखाली हट्टा पोलीस ठाण्याचे सहाय्यक पोलीस निरीक्षक गजानन मोरे, उपनिरीक्षक ए.एस. पठाण यांच्या पथकाने तातडीने गावात जाऊन दोघांनाही अटक केली आहे.