हिंगोलीत सलग दुसऱ्या दिवशी मोठा अपघात, जीप मोटरसायकलची समोरासमोर धडक

विकास दळवी, हिंगोली : हिंगोली जिल्ह्यामध्ये सलग दुसऱ्या दिवशी मोठा अपघात घडला आहे. हिंगोली ते नांदेड रोडवर असलेल्या जामगव्हाण पाटी जवळ आज साडे चार वाजताच्या सुमारास जीप आणि मोटार सायकलची समोरासमोर धडक झालीय. यामधे तिघे जण जखमी झाले आहेत. सुकळी वीर येथील जखमी रहिवासी आहेत. जखमींना उपचारासाठी तात्काळ रुग्णालयात हलविण्यात आले आहे.

दुचाकीवरुन तिघेजण ट्रिपल सीट प्रवास करीत होते. नांदेडवरून वारंगा फाट्याच्या दिशेने येणाऱ्या क्रुझर जीपने दुचाकीला धडक दिली. यात नारायण गोखले वय २६ वर्ष, नामदेव कराळे वर्ष ३० वर्ष, आणि अरविंद मुकडे वय ३० वर्ष, सर्व तिघे राहणार सुकळी वीर येथील आहेत.

बाजार करून घराकडे जात असताना सदरील घटना घडली. जखमींपैकी एकाची प्रकृती चिंताजनक असल्याची माहिती पोलिसांनी दिली आहे. या प्रकरणी पोलीस अधिक तपास करीत आहेत.

पोलिसांनी वाहन धारकांना सर्व नियम पाळून वाहने चालविण्याचे तसेच लहान मुलांच्या हातात वाहन देण्यासाठी टाळावे असे आव्हान केले आहे. दरम्यान, वर्षाच्या अखेरीस अपघातांची मालिका सुरुच आहे. दिवसेंदिवस अपघाताचे प्रमाण सुद्धा वाढले आहे. याला प्रामुख्याने वाहन धारकांचा बेजबाबदारपणा आणि घालून दिलेल्या नियमांचे उल्लंघन हे नागरिकांच्या जिवावर बेतत आहे.