एसटी संपाबद्दल मोठी बातमी, हिंगोलीतील संप मोडीत काढला, चक्क वरिष्ठ अधिकाऱ्यांच्या हातात स्टेअरिंग

हिंगोली : हिंगोलीत गेल्या तीन महिन्यांपेक्षा जास्त कालावधी पासून सुरु असलेला एसटीचा संप मोडीत काढून प्रवाशांच्या सोईसाठी परिवहन विभागाने चक्क वरिष्ठ अधिकाऱ्यांच्या हातात एसटीचे स्टेअरिंग देत आठ बसेस सुरु केल्या आहेत. हिंगोली परभणी आगार विभागाचे नियंत्रक मुक्तेश्वर जोशी यांनी आज हिंगोली आगारात येऊन बसेस सुरु केल्या आहेत.

परिवहन विभागाने सुरु केलेल्या या बसेस हिंगोली जिल्ह्यासह परभणी जिल्ह्यामध्ये देखील धावणार असून, पोलीस बंदोबस्तात एसटी बस वरिष्ठ अधिकाऱ्यांनी रवाना देखील केल्या आहेत. दरम्यान वाहक चालक उपलब्ध होत नसल्याने वरिष्ठ अधिकाऱ्यांच्या हातात अनेक वर्षानंतर एसटीचे स्टेअरिंग आलं आहे, मात्र वरिष्ठांचे आदेश आल्याने आपण एसटीचे चालक म्हणून पुन्हा एकदा रुजू झाल्याचं या अधिकाऱ्यांनी सांगितलं आहे.

आठ बसेस लागोपाठ अचानक आगराबहेर पडल्याने हिंगोली आगाराबाहेर बसलेले एसटी कर्मचारी चांगले संतापल्याचे बघायला मिळाले. बस स्थानकातून बस रवाना झाल्यानंतर रुजू झालेल्या वाहकांच्या निषेधार्थ कर्मचाऱ्यांनी जोरदार घोषणाबाजी केल्याचे दिसून आले.

आज घडीला संप सुरु होऊन जवळ जवळ तीन महिने होत आले आहेत. बस बंद असल्याने अनेक प्रवाशांना मोठ्या अडचणींचा सामना करावा लागत होता. विद्यार्थ्यांची सुद्धा मोठ्या प्रमाणावर गैरसोय होऊ लागली. दुसरीकडे, संप मोडीत काढत आज अचानक पोलिस बंदोबस्तात बसेस धावू लागल्याने हिंगोलीचे बस स्थानक तीन महिन्यानंतर गजबजलेले दिसून आले. प्रवास करणाऱ्या प्रवाशांमध्ये सुद्धा उत्साहाचं आणि आनंदाचं वातावरण बघायला मिळाले. सर्व बसेस पुन्हा सुरळीत व्हाव्यात, अशी मागणी आता प्रवाशांकडून केली जात आहे.

परंतु आज बसेस सुरु झाल्यामुळे आंदोलनकर्त्या एसटी कर्मचाऱ्यांनी तीव्र भावना व्यक्त केल्या आहेत. "एसटी बसेस दोन दिवस ट्रेनिंग घेतलेल्या चालकांच्या हाती देण्यात आलेले आहेत. प्रवासी हे आमचं दैवत आहेत. आमचे वरिष्ठ त्यांच्या हातात स्टेअरिंग देऊन प्रवाशांच्या जीवाशी खेळ करीत आहेत. प्रवाशांच्या सुरक्षेची काळजी आगाराने घेतली पाहिजे", असं सांगत आम्ही आमच्या आंदोलनावर ठाम असल्याची भूमिका कर्मचाऱ्यांनी व्यक्त केली आहे.