उद्धव ठाकरेंनी संतोष बांगरांना टक्कर देण्यासाठी टाकलेला डाव फसणार? शिवसेनेत पुन्हा दुफळी

हिंगोली : आमदार संतोष बांगर यांच्या बंडखोरीनंतर हिंगोली जिल्ह्यात पक्षाला बळकट करण्यासाठी शिवसेना पक्षप्रमुख उद्धव ठाकरे यांनी नुकतीच हिंगोली जिल्हाप्रमुखपदी नव्या नेत्याची निवड केली. मात्र या निवडीवरून निष्ठावंत शिवसैनिकांनी नाराजी व्यक्त केली असून नाराज झालेल्या पदाधिकाऱ्यांनी एकत्रित येत हिंगोली येथील शासकीय विश्रामगृहात बैठक घेतली. उद्धव ठाकरे यांनी जिल्हाप्रमुखपदाची निवड करताना निष्ठावंतांना डावल्याचा आरोप देखील यावेळी करण्यात आला.

नुकतंच शिवसेनेत दाखल झालेले विनायक भिसे पाटील यांची जिल्हाप्रमुख म्हणून नियुक्ती करण्यात आली आहे. त्याचबरोबर काही वर्षांपूर्वी पक्षात आलेल्या संदेश देशमुख यांनाही जिल्हाप्रमुख म्हणून जबाबदारी देण्यात आली आहे. या दोन नियुक्त्यांनंतर वर्षानुवर्ष शिवसेनेत काम करणाऱ्या पदाधिकाऱ्यांनी उघडपणे आपली नाराजी व्यक्त केली आहे.

मातोश्रीला खोके नवीन नाहीत, आम्हाला तोंड उघडायला लावू नका!, शिंदे गटातील नेत्याचा उद्धव ठाकरेंना थेट इशारा

उद्धव ठाकरे यांनी संतोष बांगर यांना टक्कर देण्याच्या प्रयत्नात पक्षातील पदाधिकाऱ्यांची नाराजीही ओढावून घेतली असल्याचं बोललं जात आहे. परमेश्वर मांडगे आणि रमेश शिंदे यांना जिल्हाप्रमुखपदाचे वेध लागले आहेत. त्यामुळे आगामी काळात नाराज निष्ठावंत शिवसैनिक नेमका काय निर्णय घेणार, याकडे सर्वांचं लक्ष लागलं आहे.

दरम्यान, या सगळ्या वादावर उद्धव ठाकरे आता काय तोडगा काढणार आणि नाराज पदाधिकाऱ्यांची नाराजी दूर कशी करणार, हे पाहणं महत्त्वाचं ठरणार आहे.