शाळेत जास्तीचे तास घेण्याच्या बहाण्याने विद्यार्थिनीशी अश्लील चाळे, गावकऱ्यांनी पाळत ठेवली अन्...

राज्यात महिला अत्याच्यारांच्या घटनांमध्ये वारंवार वाढ होत असताना आता शाळांमध्येही विद्यार्थींनी सुरक्षित नसल्याची घटना समोर आली आहे. या घटनेमुळे संपूर्ण परिसरात खळबळ उडाली असून पोलीस तपास सुरू आहे.

Edited byरेणुका धायबर | महाराष्ट्र टाइम्स.कॉम 11 Jun 2022, 10:54 am

हिंगोली : कळमनुरी तालुक्यातील तोंडापूर येथील जिल्हा परिषद शाळेत जादा तासिकाच्या नावाखाली विद्यार्थिनीशी अश्लील चाळे करणाऱ्या प्रभारी मुख्याध्यापकाला गावकऱ्यांनी आज (शुक्रवारी) बेदम झोडपले. त्याला पोलिसांच्या हवाली करण्यात आले आहे.

याबाबत गावकऱ्यांनी दिलेल्या माहितीनुसार, कळमनुरी तालुक्यातील तोंडापूर इथे इयत्ता सातवीपर्यंत शाळा आहे. या ठिकाणी काम करत असलेले प्रभारी मुख्याध्यापक भगवान अवचार याने मागील काही दिवसापासून इयत्ता पाचवी ते सातवीच्या विद्यार्थ्यांचे जादा वर्ग घेण्यास सुरुवात केली. शाळेतील सर्व विद्यार्थी शाळेत उपस्थित राहू लागले होते.

Weather Alert : राज्यासाठी पुढचे २ दिवस महत्त्वाचे; ठाणे, पुण्यासह 'या' जिल्ह्यांना येलो अलर्ट
मात्र, जादा तासिकाच्या नावाखाली अवचार याने विद्यार्थिनींसोबत अश्लिल चाळे करण्यास सुरुवात केली. दरम्यान, आज हा प्रकार गावकऱ्यांना कळल्यानंतर गावकऱ्यांनी पाळत ठेवली होती. सकाळी अकरा वाजण्याच्या सुमारास त्याने एका विद्यार्थिनीला वर्गाच्या बाजूला असलेल्या खोलीत बोलावताच गावकऱ्यांनी वर्गात प्रवेश केला. गावकरी आल्याचे पाहून अवचार गडबडला त्यानंतर गावकऱ्यांनी त्यास बेदम झोडपले.

यानंतर याबाबतची माहिती आखाडा बाळापूर पोलिसांना दिली. आखाडा बाळापूर पोलीस ठाण्याचे सहाय्यक पोलीस निरीक्षक पंढरीनाथ बोधनापोड, जमादार शेख बाबर, प्रभाकर भोंग यांनी तातडीने गावात जाऊन प्रभारी मुख्याध्यापक भगवान अवचार यास ताब्यात घेतले. त्याला आखाडाबाळापुर पोलिस ठाण्यात आणण्यात आले आहे. या प्रकरणात पुढील कारवाई केली जात असल्याचे पोलिसांनी सांगितले. या प्रकरणात रात्री उशिरापर्यंत गुन्हा दाखल करण्याची प्रक्रिया सुरू असल्याचेही पोलिसांनी स्पष्ट केले.

शाळेत जास्तीचे तास घेण्याच्या बहाण्याने विद्यार्थिनीशी अश्लील चाळे, गावकऱ्यांनी पाळत ठेवली अन्...

महत्वाचे लेख