या धरणाचं नामकरण करण्यासाठी प्रज्ञा सातव यांचं जयंत पाटील यांना पत्र

हिंगोली : मराठवाडा आणि विदर्भाच्या सीमेवर पैनगंगा या नदीवर ईसापुर धरण उभारण्यात आलेलं आहे. या धरणाला हिंगोली, नांदेड आणि यवतमाळ जिल्ह्याची सीमा लागून आहे. सद्या या धरणाच्या पाण्यावरुन हिंगोली आणि नांदेडच्या नेत्यांमध्ये चांगलंच राजकारण पेटलेलं असताना स्व. काँग्रेस नेते राजीव सातव यांच्या पत्नी विधान परिषद आमदार प्रज्ञा सातव यांनी राज्याचे जलसंपदा मंत्री जयंत पाटील यांना पत्र लिहून इसापूर धरणाच्या नामकरणाची मागणी केली आहे.

पत्रात काय म्हटलंय..?

मराठवाडा आणि विदर्भभूमी मध्ये नाव्हा ता. हादगाव जिल्हा नांदेड येथील आद्यक्रांतिवीर राजे नोवसाजी नाईक व त्यांचे १५०० रानी इंग्रज व निजामांच्या सशस्त्र ६००० हजार सैन्यासोबत दि.०८ जानेवारी १८१९ च्या कालखंडामध्ये स्वातंत्र्य मिळविण्यासाठी रक्तरंजित लढाई झाली. यामध्ये राजे हौसाजी नाईक व इतर ६०० साठीदारांना वीर मरण झाले. आपण भारतीय स्वातंत्र्याचा संपूर्ण देशात अमृत महोत्सव साजरा करत असताना नाव्हा येथील आद्य क्रांतिवीर राजे नवसाजी नाईक व त्यांच्या साथीदारांनी इंग्रज व निजाम सैन्याविरुद्ध केलेल्या सशस्त्र लढाईला ३१ जानेवारी २०२२ रोजी २०३ वर्ष पूर्ण होत आहेत.

इसापूर धरण तालुका पुसद जिल्हा यवतमाळ येथे आद्य क्रांतिवीर राजे नवसाजी नाईक यांचे या ठिकाणी काही वर्षे वास्तव्य होते. त्यांच्या इतिहासाची पुढच्या पिढीला प्रेरणा मिळण्यासाठी ईसापुर धरणास आद्य क्रांतिवीर राजे नवसाजी नाईक असे नामकरण करण्यात यावे, अशा आशयाचं पत्र प्रज्ञा सातव यांनी जलसंपदा मंत्री जयंत पाटील यांना लिहिलं आहे.

डॉ. प्रज्ञा सातव यांनी जलसंपदा मंत्री जयंत पाटील यांना लिहिलेले पत्र सध्या सोशल मीडिया चांगलेच व्हायरल झाले आहे. जलसंपदामंत्री यावर काय निर्णय घेणार याकडे सर्वांचं लक्ष लागलंय.