घरातून बेपत्ता झालेल्या तरुणाचा आढळला मृतदेह; 'ती' एक आवडच जीवावर बेतली?

हिंगोली : सोशल मीडियाच्या काळात सेल्फी काढण्याला अवास्तव महत्व प्राप्त झालं आहे. सेल्फी काढण्याच्या मोहात अनेक जण आपला जीव धोक्यात घालतात. हिंगोलीतही अशीच एक घटना समोर आली आहे. पुणे येथील एका तरुणाचा हिंगोली जिल्ह्यातील रेल्वे रुळाच्या बाजूला मंगळवारी दुपारी २ वाजता मृतदेह आढळून आला. स्वप्निल माणिकराव लहाळे (२०) असं मृत तरुणाचं नाव असून सेल्फी काढण्याच्या नादात रेल्वेच्या धडकेने त्याचा मृत्यू झाल्याची प्राथमिक माहिती पोलिसांकडून देण्यात आली आहे.

पोलिसांनी दिलेल्या माहितीनुसार, हिंगोली येथील रेल्वे रुळाजवळ मंगळवारी दुपारी २ वाजता एका तरुणाचा मृतदेह आढळून आला. या घटनेची माहिती मिळाल्यानंतर सहाय्यक पोलीस अधीक्षक यतीश देशमुख, हिंगोली शहर पोलीस ठाण्याचे सहाय्यक पोलीस निरीक्षक अनिल काचमांडे, जमादार संजय मार्के, डोंगरदिवे, शेषराव पोले, शेख मुजीब, असलम गारवे यांच्या पथकाने घटनास्थळी भेट दिली.

Gondia Train Accident: गोंदियाजवळ रेल्वे गाडीला भीषण अपघात; ५० पेक्षा अधिक प्रवासी जखमी

पोलिसांनी मृतदेहाची तपासणी केली असता मृतदेहाच्या कानामध्ये हेडफोन लावलेले दिसून आले. स्वप्निल माणिकराव लहाळे हा तरुण सोमवारी दुपारपासून बेपत्ता होता. पोलिसांनी छायाचित्र सोशल मीडियावर व्हायरल केल्यानंतर हा मृतदेह पुणे येथील स्वप्निल लहाळे या तरुणाचा असल्याचे स्पष्ट झाले. स्वप्निल हा दोन दिवसापूर्वीच हिंगोली येथे नातेवाईंकांकडे आला होता.

पुण्यात भीषण अपघात; पाच जणांचा जागेवर मृत्यू , तीन लहान मुलांचा समावेश

सोमवारी दुपारपासूनच तो बेपत्ता झाला होता. त्यानंतर काल त्याचा मृतदेह आढळून आला. धावत्या रेल्वे समोर सेल्फी काढण्याच्या प्रयत्नामध्ये रेल्वेच्या धडकेने त्याचा मृत्यू झाल्याचा प्राथमिक अंदाज पोलिसांनी व्यक्त केला आहे. मृत स्वप्निल यास सेल्फी काढण्याचा छंद होता, असंही त्याच्या नातेवाईकांनी पोलिसांकडे स्पष्ट केल्याचे पोलीस सूत्रांनी सांगितलं आहे. दरम्यान, स्वप्निलच्या मृत्यूने कुटुंबावर दुःखाचा डोंगर कोसळला असून हिंगोली शहरात एकच खळबळ उडाली आहे.